GIINGONG hitman sa usa ka gang nga gilambigit sa pagpatay sa duha ka mga teenager sa Tejero, dakbayan sa Sugbo nadakpan sa miaging hapon sa kapulisan.
Usa ka pulis naangol human paaka sa suspek ang bukton dihang siya gidakop pasado alas 4 sa hapon sa Urgello, Brgy. Sambag Uno.
Ang suspek giilang mao si Aldus Arregadas, 18, nagpuyo sa maong dapit, gilambigit sa kapulisan sa daghang mga kaso sa pagpamusil nga gikalambigitan sa Crips gang.
Si Senior Inspector Vicente Velasquez, hepe sa kapulisan sa Homicide Section nga nahinabi sa mga tigbalita, niingon nga ang ngalan ni Arregadas maoy gitug-an sa mga saksi sa pagpusil patay kanila ni Kenneth Veloso ug Ana Marie Boqueron.
Si Arregadas, uban ni Jordan Alueta, 18, gitumbok nga maoy ningpusil sa duha ka mga biktima.
Sila si Veloso ug Boqueron nag-estambay daplin sa dan uban sa kanhi uyab ni Alueta dihang sila girakrakan gamit ang usa ka machine pistol.
Namatay diha-diha ang mga biktima tungod sa kadaghan sa mga samad nga ilang naangkon.
Matod ni Velasquez nga naglakaw ang suspek uban sa iyang inahan sa dihang giduol sa mga sakop sa Homicide Section.
Sa dihang nakamatikod nga mga pulis ang ningduol kaniya, nisuway kini sa pagdagan, apan ilang nagunitan.
Nagsigi kini og lugnot, hangtod nga si PO2 Julius Reges napaakan sa wa nga bukton, nagisi ang t-shirt ug nagaras pa ang iyang bukton.
Gisikop si Arregadas ug giawhag sa kapulisan ang mga biktima sa pagpamusil o mga saksi sa pagpakita sa buhatan sa Homicide Section aron maila o matumbok ang dinakpan nga maoy responsable sa krimen.