HINGPIT na nga gipasakaan og kaso ang upat ka mga sakop sa New People’s Army (NPA) niadtong Nobiyembre 20.
Ang mga akusado naila nga sila si Omben alyas Ronron alyas Jhon; Lino Namatidong alyas Dahun; Mylen Colita alyas Maymay, ug Toto Taquin alyas Jepoy kinsa giingong miyembro sa Guerilla Front Sub Regional Committee 1 sa North Central Mindanao.
Gipasakaan og kaso ang maong mga sakop sa NPA human nga naila kini sila sa mga biktima ug saksi.
Giingong niadtong Mayo 28 ning tuig 2019 mga alas 10 sa gabii sa Sitio Aurora, Barangay Sto. Niño, Manolo Fortich, Bukidnon gitabangan niining maong mga suspek ang usa ka sibilyan ilabi na usa ka Barangay Tanod sa maong dapit.
Gibutyag ni Regional State Prosecutor Merlyn Uy, chairman sa legal cooperation task group ubos sa Regional Task Force To End Local Communist Armed Conflict, nga kini nga kaso ang labing unang kaso nga giduso batok sa mga NPA.
“Basig matingala mo why we’re saying nga this is the very first in the country nga gi-file nga kaso against the International Humanitarian Law (IHL), naka file na og kaso ang DOJ against sa mga Maute because of the Marawi siege but this particular case in the very first against New People’s Army,” matud ni Uy.
Gidugang pa nga kini tungod sa dugay na nga panahon nga dunay gyera ug kani nga kaso nakita ang mga paglapas sa tawhanong katungod nga gihimo sa mga NPA ngadto sa inosenteng sibilyan ug angayang manubag sa balaod ang mga responsable.
“This particular case highlights the violations committed against noncombatants or innocent civilians,” dugang pa.
Gibutyag usab ni fiscal Rommel Alonto, public prosecutor sa probinsiya sa Bukidnon, nga dakong kasupakan kini sa IHL ilabi na nga inosenteng sibilyan ang biktima.
“Siya gi-subject siya sa cruel or inhumane treatment,gi- threatened siya, gitionan siya’g pusil, gipasakitan siya og maayo dayon gipabuthan pud og mga armas,” matud ni Alonto.
Gidugang ni Brigadier General Edgardo de Leon, kumander sa 403rd Infantry Brigade, nga kini ang ilang gibutyag kaniadto nga mopasaka og pormal nga kaso batok sa mga liderato sa CPP-NPA aron mahunong na ang pagpangatake sa grupo ngadto sa inosenteng sibilyan.
“At ito pong insidenteng ito ay tahasang inamin ng nagpakilalang spokesperson ng North Central Mindanao ng Regional Committee na si Pia Paraiso, na i-document po natin,” matud ni De Leon.
Giingong naila sa mismong mga biktima ang mga responsable ilabi na si Ramiro Melgo.
Kini nga kaso kalabot na sa nahitabong pagsunog sa mga sakyanan ug pagpamusil sa mga Barangay Tanod sa maong dapit.
Kumpiyansa usab si Fiscal Aldrich Uayan, associate provincial prosecutor, nga lig-on ang ilang mga nahuptang ebedensiya kalabot na sa mga gipasakaan og kaso.
Ang maong insidente ang gikabutyag nga gi-angkon usab sa walhong grupo pinaagi sa pahayag sa tigpamaba sa maong grupo ilabi na ni Pia Paraiso.
Gipasaka na ang maong kaso sa Regional Trial Court sa Branch 25 nga gi-disegnar sa Supreme Court nga mo-dungog sa mga IHL nga mga kaso pinaagi na usab sa 403 IB.
“Bilang pagtugon po sa aming commitment na umpisahan na ang pag-file ng IHL violation laban sa liderato ng CPP-NPA,” matud ni De Leon.