MIPING-IT ang mga operator sa taxi sa Siyudad sa Cagayan de Oro tungod kay naglisod na sa kinitaan tungod sa nagkadaghan nga mga kolorum nga taxi ug aduna pay mga kompetensiya.
Gibutyag ni Bonifacio Balucan, 63, operator sa Bonbal taxi, nga dako kaayo ang nawala kanila ug galisod gyud sa maintenance ilabi na sa abangan sa mga drayber.
“Imbes moabang sila og sa isa ka semana og lima ka adlaw, moabang nalang og tulo, duha, unya ang maintenance gakasaka, pagkaguba kulang pa ang abang kaysa maintenance,” matud ni Balucan.
Gidugang pa nga ni-surrender na kini ug gipamaligya na ang iyang mga taxi.
“Wala surrender gyud ko ako gipamaligya akong unit, nabinlan nalang ko og usa ka buok taxi, 12 ka buok di naman maagwanta gansi gyud,” dugang pa.
Giangkon usab sa drayber nga si Boy Uba, 53, ug 25 na ka tuig nga nagmaneho nga lisod na gyud kaayo.
“Mas bintaha pa tong kaniadto nga kami tanan legal, karon murag apeke na, dako ang epekto pila na sila nakabawas sa among kinitaan,” matud ni Uba.
Gidugang pa niini nga nabintahaan sila sa mga kolorum ilabi na nga medyo daan na ang ilang mga unit.
“Kaning mga dili legal mga bag-o biya sila, kay naa po’y kinaiya sa Cagayan de Oro nga mamili pud og bag-o, sauna mo minimum man ko og P500 karon di nako kaabot, tungod sa kadaghan sa kompetensiya,” dugang pa.
Nasayran nga nagpahigayon ang Land Transportation Franchising and Regulatory Board (LTFRB) og tulo ka adlaw nga inspeksiyon sa mga taxi sa Upper Carmen, Siyudad sa Cagayan de Oro.