MAPASALAMATON ang lalawigan sa Davao del Sur sa sunod-sunod nga tabang nga ilang nadawat gikan sa nagkadaiyang probinsya.
Adlaw’ng Miyerkules ug Huwebes, Nobyembre 21 ug 22, nadawat ang ayuda nga mobalor sa P2 milyon gikan sa probinsya sa Misamis Oriental.
Si Davao del Sur Governor Douglas Cagas nipaabot sa iyang mensahe dili lang kang Misamis Oriental Governor Bambi Emano apan alang sa katawhan sa Misamis Oriental.
“Dili lang sa inyong gobernador apan sa katawhan sa Misamis Oriental gipangulohan ni Bambi Emano,” pasiuna ni Cagas ug niingon nga soud niyang higala ang pamilya Emano sukad pa kaniadto.
“Pasalamat kaayo ko nga nia diri ang taga Misamis Oriental ug ang leadership ni Governor Bambi Emano sa MisOr nga nagatabang sa amo dako kaayo og tabang sa katawhan ang inyong tabang diri we need everybody’s help and your presence actually give us the genuine feeling that we are not alone may kasama kami sa among kagoul ug sa kakuyaw. Imagine people from Misamis Oriental nagtravel anhi diri just to comfort us that a big big thing. Salamat kaayo we will remember this,” butyag niini.
Lakip sa gipasalamatan ni Cagas ang Dakbayan sa Cagayan de Oro ug Gingoog City nga nagpaabot og tabang.
Ang probinsya sa Bukidnon bag-o lang sab naghatag og tseke alang sa tabang ug gani nasubo kini nga human og tunol kanila sa tseke pagkagabii gitay-og sa 5.9 magnitude nga linog ang Bukidnon.
“Nakaingon ako ni Governor Ma Zubiri nga ibalik ko nalang kining tseke kaninyo kay nagkinahanglan man gihapon kamo,” pasiaw niini.
Hagit
Aminado si Cagas nga dakong hagit sa iyang pamunoan ang pag-igo sa linog tungod kay sukad sa iyang pagkatawo, nahimong gobernador sa pipila ka mga katuigan wala sukad mahitabo nga sila gilinog.
Upat ka hugna sa paglihok sa yuta sila naapektuhan karon lang ning bulana kon diin moabot ngadto sa P1.5 bilyon ang damyos.
Mokabat sab sa 232 ka mga barangay ang apektado nga gilangkuban sa 101,000 ka indibidwal.
Sa ilang lugar lang kini tagsa-tagsa nagpasilong kon asa adunay mga mokabat 28 ka mga evacuation center.
Dugang niini nga kaniadto pa niya gisultihan ang mga mayor nga matag lungsod magbaton og lugar nga gipanag-iyahan sa gobyerno aron nga sayon ang katukoran sa relokasyon kon adunay kalamidad.
Hagit kaniya ang sitwasyon karon sa mga apektadong pamilya nga laumang maabtan pa og pila ka tuig maka-recover.
“Ang ako lang nga mohatag mi kanunay sa ayuda alang kanila ug masustiner kini,” sulti pa niini.
Matud ni Cagas nga usa na ka bulan ang nilabay gikan gitay-og sa kusog nga linog ang lalawigan apan sunod-sunod nga reklamo sa katawhan ang ilang nadawat sama na sa gipul-an og sige kaon sa mga tinapa ug uban pa nga de lata.
“Although ang mga tao pul-an na sila og sardinas. Nahimo na gani ni nga isyu kay akong giingon nga kung mahimo atong hangyoun ning mga donors nga gulay nalang ug bulad ug among gihimo isagol namo sa sardinas nay bulad nay gulay lipay kaayo ang mga evacuees,” matud ni Cagas ug malaumon nga malampasan ra gihapon kini nga kalamidad nga mihapak kanila.