SUBSOB nga imbestigasyon ang gihimo karon sa kapulisan aron matumbok lang ang inahan nga responsableng milabay sa iyang anak alas 11:31 sa buntag niadtong Nobiyembre 20 sa Purok 3, Barangay 3, Malaybalay City.
Daling niresponde ang kapulisan sa Malaybalay City Police Station pagpangulo ni Police Sergeant Ruby Joy Sambaan, imbestigador sa Women and Children Protection Desk.
Sa inisyal nga imbestigasyon, usa ka Jhun P. Pescador, 41, taga Baklayon, Lantapan, Bukidnon ang nibisita sa iyang anak sa Luna Boarding house dihang nagkaguliyang ang mga boarders ug ilang nadungog ang hilak sa bata likod sa puloy-anan.
Deretsong giadtoan ang luyo ug didto nadiskubre ang bata nga giputos sa itom nga tela ug gitabonan og dahon sa gabi.
Dali kining gidala sa Bethel Baptist Hospital alang sa medical attention ug gikoordinar na ang buhatan sa City Social Welfare and Development Office.
Ang kapulisan pabilin nga nag-imbestigar kinsa ang responsableng milabay sa batang babaye nga gituohang bag-o lang gihimugso human nagkadugo pa kini.