AMAS, Kidapawan City -- Gisaksihan ni Senador Christopher “Bong” Go ang paghatag og tabang pinansiyal ngadto sa tulo ka mga lokal nga gobyerno kinsa grabeng naapektuhan sa makusog nga linog.
Gipahigayon ang turnover ceremony sa provincial capitol sa North Cotabato Biyernes sa udto, Biyernes, Nobyembre 22.
Nasayran nga daghang barangay dinhi sa dakbayan, sa mga lungsod sa Magpet ug Makilala sa maong probinsya, ang naigo sa tulo ka sagunsong linog diin daghang mga balay ug mga imprastraktura ang nahugmak.
Dakong bahin sab sa kadalanan ang miliki tungod sa fault line.
Dakong tabang sa mga biktima sa linog ang hinanaling pag-aksiyon sa mga nasyonal nga ahensiya sa kagamhanan aron makasugod pagbalik sa normal nga panginabuhi.
Gipakita sab sa National Housing Authority (NHA) ang model house nga itukod kanila aron mahimong temporaryong kapuy-an.
Ang lungsod sa Makilala nakadawat og P10 milyones, P5 milyones sa siyudad, ug P3 milyones sa Magpet gikan sa Office of the President.
Una nang gihatagan sa senador og tag P3,000 ang mga nabiktima sa linog sa una niining pagbisita sa dakbayan di pa dugay.
Gihangyo sab ni Go ang mga lokal nga gobyerno nga ihiklin una ang politika ug tinud-on ang pagtabang sa mga biktima sa linog.
Gikan dinhi, milahos ang senador sa Davao del Sur Sports Complex alang sa pagtunol sa ayudang pinansiyal sa mga biktima sa linog sa Digos City, mga lungsod sa Bansalan ug Magsaysay. (Orlando B. Dinoy)