DUHA ka construction worker ang gipangdala sa Buhangin Police Station kay naglalis ug misangko sa pagpanunggab gumikan nagpahambugay kinsay dako’g kinatawo.
Alas 9:30 sa gabii niadtong Martes, Nobyembre 19, miresponde ang mobile patrol sa Buhangin PNP sa Sitio Balon, Barangay Tigatto, Buhangin District, Davao City gumikan sa report nga dunay nagdinunggabay.
Pag-abot sa lugar, naatlan sa pulis nga nagkadugo ang kamot ug tuhod sa biktima nga si Hermelito (bansagon gitago), 32-anyos, human dunggaba sa suspek nga si Richard (bansagon gitago), 20-anyos, pulos nagpuyo sa dapit.
Sa impormasyon nga nakalap gikan sa kapulisan, nasayran nga nagtagay og ilimnong makahubog ang duha ug sa dihang nangahubog na, nag-isi’g pahambogay sila kung kinsay dako og kinatawo.
Dihang miinit na ang ilang panag-istorya, misangko na kini sa lalis ug miuli ang suspek sa ilang balay gumikan ginabira siya sa biktima aron papaminawon kaniya sa iyang gipanghambog nga dako siya’g kinatawo.
Giingon nga gipatulan sab sa suspek og pahambog ang biktima nga dako siya og kinatawo ug ang sekreto niini, apan ang biktima giingong dili kadawat sa istorya hinungdan nga milakaw na lang ang suspek ug nalagot.
Taud-taod, mibalik ang suspek ug nagdala og kutsilyo dayon gidunggab ang biktima, apan nakalikay kini.
Sa ilang linayugay, nasamdan ang biktima sa tuhod ug kamot samtang bun-og sa nawong ug black eye ang naangkon sa biktima.
Dangtan og minuto nasikop ang suspek ug dungan sila nga gipangdala sa Buhangin Police Station.
Sa pinakaulahing kalamboan sa istorya, nagkasinabot ang duruha sa kapulisan apan mag-abot pa sila sa barangay aron didto sila mahusay.