MOABOT ngadto sa 150 ka teams ang magpinatiray sa pagsugod sa 8th SunStar Football Cup karong adlawa sa Cebu City Sports Center.
Ang Don Bosco Technical College, nga minglangkat sa mga titulo sa Cebu Schools Athletic Foundation Inc. ug Cebu City Olympics dili pa lang dugay, mao ang mangulo sa 31 ka teams nga magkombati sa Players 7, 9, 11 divisions ug Boys 13, 15, 17, 19 age groups.
Ang ubang teams nga adunay daghang entries mao ang Paref Springdale, University of San Carlos-Basic Education Department, Cebu International School ug Bright Academy.
Aduna sab teams gikan sa lungsod sa Balamban, Bohol ug Ormoc City nga mosalmot sa kompetisyon.
Kombatihon karong adlawa mao ang Players 7, 9, ug 11, Girls 15, 17 ug 19 lakip na ang Boys 17 age groups.
Sa Girls 15, ang powerhouse Sheba FC makigbatok sa Juan Tikis FC unya makigharong ang Balamban FC batok sa Carabell FC.
Masangka sab karon ang Girls 17 teams nga mao ang Sheba FC, St. Theresa’s College, Bright Academy ug King Forest Labugon.
Ang Girls 19 Under adunay 10 ka entries nga gitunga sa duha ka mga grupo.
Naa sa Group 1 ang STC, Southwestern University, Bright Academy, USOL ug Ormoc Soccer Association samtang naa sa Group 2 ang Cebu City Olympics futsal champion USC, Southcrest, CIS, Balamban ug Tagbilaran.
Ang kombati sa ubang mga kategoriya ipahigayon ugma. (ML, ESL)