ANGAY hatagan og aksiyon sa mga kadagkuan sa Bureau of Fire Protection (BFP) kinining reklamo kalabot sa ilang mga tawo nga nadestino sa dakbayan sa Naga.
Kini kabahin sa sunog nga nahitabo niadtong Huwebes, Nobiyembre 21, 2019 sa alas kuwatro pasado sa kaadlawon sa Barangay Inoburan, diin miugdaw og upat ka balay samtang laing duha ang partially damaged.
Reklamo sa mga nabiktima sa sunog mao ang grabing kalangay sa pagresponde sa BFP-Naga nga unta wala may trapik niining orasa. Matod pa nga modul-an sa 20 ngadto sa 30 minutos una pa moabot ang mga bombero.
Dugang sa alegasyon nga lisod kontakon ang buhatan sa BFP-Naga tungod kay busy ang telepono hinungdan nga napugos na lang ang mga residente ug silingan sa nasunogan sa pag-adto personal sa BFP-Naga office nga anaa mahimutang sa Barangy East Poblacion.
Kon unsa kini katinuod ang maong mga pasangil, kini maoy angay susihon kay dakong kalahian ang nabutang sa incident report nga gisumiter ngadto sa buhatan sa mayor.
Sa report sa City Disaster Risk Reduction and Management Office (CDRRMO), ilang giingon nga nadawat ang alarma alas 4:23 sa buntag gikan sa usa ka Vicente Candelosa, barangay Tanod sa Inoburan nga nangayo og tabang sa BFP-Naga.
Dugang sa report nga pinaagi sa ilang communicator Von Reymond Alinsonorin, naka-dispatsa gilayon sila sa ilang rescue van sa alas 4:24 sa buntag.
So, migintang lang diay og usa ka minuto gikan sa pagtawag ang ilang pag-responde. Lupig pay Superman ug tinuod man gani ni. Sa incident report, gideklarar nga hingpit kining napawong mga alas 5:47 sa buntag.
Mora man og wa motukma sa tinud-anay nga sitwasyon. Kon ingon ana sila kapaspas nganong miabot pa man og upat ka balay ang nasunog?