SAYON ra paglitok og mahait nga mga pulong o pananaway sa uban apan kung ang hingtungdan na gali maoy sawayon, mag-wild gilayon kay di kadawat unya mangita og paagi nga makabalos, di ba?

Unsaon man pag-ila sa mapa-segarbuhon?

Dali rang mailhan ang dunay taas og garbo sa kaugalingon kay kanunay kining mubo og panan-aw sa uban labi na niadtong wa ka human og eskwela, ubos ang rangko sa trabaho, kabus o ba kaha way kabangka-agan sa kinabuhi.

Sa natad sab sa relihiyon, kini sila dunay pagtuo nga sila ray anak sa Ginoo kay sila ra may manimba ug nga sila ray malangit ug makasulod sa gingharian sa atong amahan.

Dali sab ni silang maka-husga sa kinabuhi sa uban nga di nila kaparehas o ka level sama sa panamit, tunghaan sa mga anak, ranggo sa trabaho ug lugar nga ka shoppinganan o suruyan.

Dali ra sab ni silang makakita sa sayop ug kahiwian sa uban unya pa ra ba kay dali kining manabi ug mopakatag ngadto sa uban.

Dali sab ni silang makakita sa kakuwangan sa uban kaysa kaugalingon unya dali sab kining makatabi o stismis.

Kasagaran ini nila uhaw og mga pagdayeg gikan sa uban unya kusog sab magbuot. Para niya siya ray daghang kahibalo ug nga ang iyang pa-agi da best kanunay.

Kung masayop man ugali, lisod kini padawaton sa iyang mga kahiwian ug kapakyasan.

Kasagaran sab ini nila mga perfectionist unya kusog magbuot-buot. Ang iyang gusto kanunay maoy matuman di lang sa iyang pamilya kundi sa iya sab nga trabahoan ug mga higala.

Di sab kini ganahan mag apil-apil og mga kalihukan kay basig masayop o himuong kataw-anan.

Bisag nagkalisod di sab kini mangayo og tabang kay para ini niya insakto o sobra iyang katakos.

Di sab kini ganahan mangimbitar o magpasulod og bisita sa iyang pinuy-anan kay mahadlok nga sawayon.

Katapusan, maglisod kini og pangayo og pasaylo o litok sa pulong pasaylo-a ko kay ang garbo ini nagpasulabi kaysa pagpa-ubos.

Angay hinuktukan ug personal nga susihon ang kaugalingon kung ikaw buta ba sa imong kaugalingong garbo.