DAGHANG contingent gikan sa Mindanao ang dili makasalmot sa Sinulog 2020. Ang rason mao ang sunod sunod nga linog nga niigo sa ilang dapit sa nakalabay nga mga semana. Sumala sa mga tigpasiugda sa Sinulog duna pa gihapoy nipadayag og commitment nga moapil.
Sa tinud-anay lang ang Sinulog Grand Parade dugokon sa daghang mga tawo tungod sa mga contingent nga mosalmot.
Sa ato pa way cultural nga aspeto sa kapistahan ni Senyor Santo Niño nga maisip nato nga mabolokon kong wa ang mga contingent nga mosalida diha sa karsada lahos na ngadto Cebu City Sports Center diin nagpaabot ang liboan ka mga tawo.
Di pa siguro uwahi ang tanan pagdasig sa ubang contingent sa mga dapit nga wa maapektuhi sa linog nga mosalmot.
Ambot og sakto ba ning akong sugyot. Pipila ka bulan sa di pa ang Sinulog magsugod ang pagdapit sa mga contingent sa pagsalmot. Sa mga dapit nga wala pa gyud makasulay og apil, personal nga dapiton pinaagi sa pagpadala og mga representante nga makighinabi sa mga LGU.
Apil sa hilisgutanan mao ang criteria, premyo, accomodation ug ubang detalye sa pagsalmot. Agi og paghatag og gibug-aton sa kaseryoso sa ilang inbitasyon ang taga Sinulog mopahuwam sa ilang mga choreographer nga libre ngadto sa mga contingent nga nanginahanglan og tabang.
Di ba ang taga Sinulog duna may workshop nga himoon alang sa mga choreographer sa di pa ang competition?
Ang ilang mga choreographer dasigon sa pagsalmot unya apilan pa gyud og libre nga accomodation. Gawas sa choreography mas nindot nga duna say workshop para sa musicality.
Sa akong nasayran gikan ni Elvis Somosot ang judge alang sa musicality matag Sinulog, dakong bahin sa impact sa presentasyon sa matag contingent mao ang musicality.
Gani dakong porsento sa judging gibasi sab sa kahan-ay sa ilang kahanas pagpadungog sa mga instrumento nga gigamit.
Dihay Sinulog nga nangutana ko niya nganong napildi sa Best in Musicality ang contingent giabibahan og maayo ang ilang abilidad sa pagpa bati sa ilang mga instrumento.
Ang iyang tubag nagkayagaw ang usa ka sequence sa ilang musika. Kita nga mga yanong tumatan-aw di makabantay niini. Pero ang dunggan ni Elvis hilabihan ka hait nga maminaw sa ilang salida. Basi niini makaingon ko nga mas maayo nga may workshop nga pasiugdahan alang sa aspeto sa musicality sa matag contingent.
Sa mga nagsugod na og praktis para sa Sinulog 2020 kudos kaninyong tanan. Nahibalo ko nga ang pagdaug maisip nga bonus nalang na sa tinud-anay nga katuyo-an sa pagsalmot nga mao ang kinasingkasing nga halad alang sa batang Jesus. Sa tagdumala sa Sinulog, gawas sa premyo mahimo ba nga patas-an pa nato ang level sa accomodation alang sa mga participants. Kita may host ato silang tagbawon og maayo sa Cebuano hospitality nga kanunay natong gipasigarbo.