BANTAYANAN ang politikanhong kaugmaran sa siyudad sa Sugbo. Pabiling gitamod si kanhi Pres. Don Sergio Osmeña Sr., The Great Old Man of Cebu nga mikulit og kasaysayan. Iyang anak si Serging Jr., ang Niño Bonito sa Sugbo giingong manluluwas sa demokrasya nga nakapatalaw sa mga goons sa Durano-Cuenco Fusion nga gitawag og mga bungoton ug dos-por-dos sa dekada 50.
Napiling mayor, gobernador, kongresista apan napakyas sa pagka pangulo sa nasod kay gitikasan ni Pres. Ferdinand Marcos sa 1969. Nanuhotsuhot pa gihapon ang liderato sa bansagong Osmeña. Gani gihulagway ang Cebu City nga Osmeña Country. Napilde tuod si Mayor Tomas Osmeña gumikan sa mga gumonhap nga naglimin. Hinoon nakatampo sa iyang kaparotan ang bati nga taras. Naa paman sila si Margot, Miguel, Mennie, Georgia, Junjun, Ritchie ug RG. Samtang napalong na sa politika sila Lito ug Sonny Osmeña gumikan sa pangidaron. Bisan napilde si Osmeña apan wala gihapon motak-om. Misang-at og kaso sa Ombudsman batok nila ni Mayor Edgar Labella, City Legal Atty. Rey Gealon ug City Administrator Floro Casas human isalikway ang iyang hangyo nga ayohon ang giguba niyang opisina. Gikiha ang siyudad aron pagdiskasi sa pagbaligya sa tipik sa SRP ngadto sa SM, Ayala ug Filinvest panahon ni Mayor Mike Rama ug pagsanta sa paggamit sa halin.
Tan-awonon sa 2022 kay ning sayo pa giintriga ang Mike Rama-Raymond Garcia tandem ubos sa Barug-Team Rama nunot sa paglig-on sa Kusog ni kanhi Mayor Alvin Garcia. Posibling magtigi unya ang BOPK, PDP Laban ug Barug Team Rama. Kon mabuak ang mga sumosunod sa Labella-Rama napanglantawan nga mobanaag ang Osmeña Republic. Sa miaging eleksyon maoy padrino ni Labella si Sec. Michael Dino ngadto sa PDP Laban nga hilabihan kalig-on.
Dili maayong tilimad-on. Supak si Rama sa pag-usab sa rota sa BRT. Miuknol nga giumol ang Sinulog Governing Board nga giingong mosapaw sa bulohaton sa Sinulog Foundation nga natukod sa 1984. Dili parehas og baruganan sa dugang ayuda sa mga senior citizens. Pagtaktak ni Atty. Coping Fernandez sa MCWD board nga tinudlo ni Rama. Sa housing mangita pag luna ang siyudad apan nganong dili man sundon ang daan nang han-ay ni Rama sa mayor pa nga 10 ka socialized housing nga tulo sa Lorega, duha sa Citi Center ug lima ka resettlement sa Mambaling ingon man nga duna pay tulo ka half-way house.
Kinahanglan og hilot aron dili masiak ang ilang panaghiusa. Hinoon ang grupo nanghinaot nga dili moinat ang gintang sa daw gikapulot nilang relasyon sa politika. Kahinomdoman sila si Rama ug Labella sakop ni Osmeña sa BOPK apan miabot ang higayon nga sila nagsinungayay sa politika. (csa_1156yahoo.com / 09064648954)