SUMASAWOP na ang Adlaw.
Ania ako: Gasud-ong sa nagdangadanga
nga kilumkilom.
Mipasunding sa akong handurawan
ang halayo nang bayhon sa kagahapon.
Nakita ko ang akong kaugalingon
didto sa among banika uban
sa kabataan kong barkada.
Nangaligo kami sa ulan. Sadya
ang tanan human matuman mga buhat
gisangon sa among mga ginikanan.
Gikan sa tunghaan kami nagganayan
sa tubod pagsawod og tubig mainom.
Kami nanuot sa libon nanghipos
og mga layang sanga nga sugnuron.
Ug kami nangumpay alang sa kabaw
sa among mga Tatay -- kabulig sa uma
nga nagabudlay.
Sumasawop na ang Adlaw.
Ania ako: Gasud-ong sa akong mga apo.
Sila, gikan sa tunghaan. Ilang mga libro
ug mga nutbok gipang-itsa sa suok.
Unya sila nanaglumba paingon
sa kompyuteran sa among silingan.
Wa gani molingi nako nga naghinuktok
sa kasagmuyo!