NAGPAHIGAYON na og imbestigasyon ang Department of Education (DepEd) 7 sa pagdakop sa usa ka maestro sa high school tungod sa pag-abuso sa iyang tinun-an sa siyudad sa Naga.
Ang maestro nadakpan dihang nalutsan og warrant of arrest sa kasong acts of lasciviousness ug sexual harrasment tungod sa giingon gihilabtan niini ang tinun-an.
Matod ni Salustiano Jimenez, Assistant Regional Director sa DepEd 7 nga amdam sila mopasaka og kaso kung mahibal-an nga adunay kalapasan nga gibuhat ang maong maesto.
“We file a case. Kung mahimo pa, i-dismiss gyud ang teacher wala lay indicating circumstances or possible we will dismiss kung klaro gyud nga naay salaot nga gibuhat,” saysay niya sa SunStar Cebu.
Matod niya, nihatag na sila og panudlo sa superintendent sa Naga nga mo-submit ug report sa ilang regional office aron ilang masuta kung unsa ang silot nga ilang mapasaka ngadto sa maong maestro.
Sigon usab niya nga ang tanan principal sa Rehiyon 7 apil ang mga mangtutudlo nasayod na sa mga silot ug pangpagula sa mga ing-ani nga klase nga mga kaso ug kung unsay mahitabo kanila kung mapamatud-an nga sal-an sa nahitabo. Anaa na usab silay napasuspenso nga mga mangtutudlo tungod sa maong kaso.
Aduna usab silay ipahigayon nga mga debriefing alang sa mga biktima ug kung kini usab biktima sa child abuse, anaa silay gisugo nga moatiman niini ug ipaagi ug debriefing ang biktima.
Sigon ni P/Maj. Leo Ty, hepe sa Naga Police Station, nga nakapiyansa na ang maong maestro niadtong Biyernes sa hapon, Nobiyembre 22, busa gawasnon kini. JCT