Dili na mauli sa mga hingtungdan ang ilang mga vape nga nakompiska sa kapulisan ug panggub-on.
Mao kini ang pamahayag ni P/Brig. Gen. Valeriano De Leon, direktor sa Police Regional Office (PRO) 7.
Apan ang retiradong huwes sa Regional Trial Court (RTC) nga si Meinrado Paredes nagkanayon nga kinahanglan nga ibalik kini sa mga tag-iya human walay tino nga balaud nga nagdili sa pagbaligya o paggamit sa maong butang.
“If an object is an instrument in the commission of the crime, iuli gyod na. But if it is an instrument of the crime, then dili na siya mauli pero unya na na i-decide kung instrument or not kung naa nay case in court,” matod ni Paredes sa SunStar Cebu.
“Kung mo-insist ang tag-iya, aw, naa ra na sa police but to my mind, iuli na kay that is not a property subject to any crime kay as I’ve said, wala man ta’y criminal statute banning anang vaping. Naa ra may presidential directive,” dugang niya.
Samtang si De Leon nagkanayon nga gidili sa publiko ang pagpanigarilyo gamit ang e-cigarette.
Sa kasamtangan, ang pagkompiska pa lang una sa mga vape kon si kinsa ang masakpan nga naggamit niini sa publikong dapit. Samtang nagpaabot sila sa kamanduan gikan sa Camp Crame bahin sa pagsikop sa mga nanigarilyo niini.
Gitin-aw ni De Leon nga subay sa direktiba walay dakpon sa mga naggamit ug vape.
“Sa atin kukunin natin sila pati na ang kanilang mga gamit but later on pwede naman natin mag-file nang charges against sa kanila.,” matod ni De Leon.
Ug kagahapon, Biyernes, gipresentar sa Cebu city POlice Office (CCPO) ang 230 nga mga nakompiska nga mga vape sa Metro Cebu.
Sa miaging adlaw, nibalat na sa 141 ka vapes ug e-cigars ang nasakmit sa dakbayan ug lalawigan sa Sugbo. BBT, WBS