Dakong multa sa nanagtukod og mga estraktura sa Kawasan Falls

PAHAMTANGAN og P10,000 ngadto sa P200,000 nga multa matag adlaw ang mga tag-iya sa mga nagtukod og permamenteng estruktura nga nasulod sa 20-meter easement zone sa Kawasan Falls sa lungsod sa Badian.

Kini kon magpadayon gihapon sa ilang operasyon bisan sa mando sa kagamhanan sa lalawigan sa demolis niini.

Atol sa pakigtagbo ni Gobernador Gwendolyn Garcia sa mga negosyante, gikauyonan nga gub-on ang mga milapas nga estruktura.

Apan ang mga negosyante ninghangyo nga lugwayan pa ang deadline sanglit mga dagkong estruktura kining nahimutang sa ilegal nga luna.

Unang mihatag og tagal ang gobernador kutob na lang Nobiyembre 30, 2019 aron gub-on sa mga tag-iya ang mga estruktura, apan tungod sa hangyo, gilugwayan na karong Enero 20, 2020 diin ang mga nanag-iya mismo maoy mangunay pagguba.

Bisan og niuyon na ang sakop sa Kawasan Falls Cooperative, may usa kanila nga wa mouyon sa maong plano.

Kini mao ang estruktura nga gipanag-iya ubos sa pangan ni Emma Saldua nga gituohang nagsugod ug operate niadtong 1990.

Matod sa gobernador nga atol sa mga pakigtagbo nga gibuhat, wa kini mutambong sa miting ug gani nagbutang pa kini og tarpaulin gawas sa estruktura nga nagpakita sa pagbabag niini sa planong demolisyon.

Gawas sa pagtukod og mga estruktura sa 20-meter easement zone gikan sa falls, atol sa pakisusi sa Provincial Environment and Natural Resources Office (Penro), wala usab kini building permits, mayor’s permit, discharge permit alang sa mga pansayan ug pagtukod og mga dagkong estruktura bisan paman mga cottage lang nga gagmay ang gitugot.

“Structure belonging to the Salduas, the EMB will be issuing them their violations sa ECC including the no discharge permit, violation mana naa man na silay comfort rooms, septic tanks after which iforward nana ilang kaso sa pollution ajudication board which will determine if pilay dapat bayran per day since the start of operation. It can range ang penalty from P10,000 to P200,000 a day to be reckoned from the start of operations now,” matod ni Garcia.

Gawas sa multa nga atubangon sa wa musanong, gilaraw usab nga kanselahon ang business permit sa mga Saldua ug dili na kini makapadayon sa nahisgutang negosyo.

Alang sa mga miuyon sa planong demolition makapadayon gihapon sa ilang negosyo.

“Katong uban they were allowed to continuetheir business and operate pero si Saldua i-cancel na iyang business permit sa LGU and he can no longer operate and for this he can no longer operate katong negosyo niya sa mga lamesa ug bangko,” matod ni Garcia.

Base sa report sa Penro, may 32 ka mga sementadong cottages, 16 ka mga kasilyas, 18 ka septic tanks, upat ka dressing rooms ug 77 ka picnic sheds ang misupak sa balaod.

Sa himuon nga demolisyon nga sugdan sa sunod tuig ug gitahasan ang kapulisan sa probinsya nga moabag sa lokal nga kagamhanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph