Dili mominos kaunom na gibadlong ug gidakop sa mga sakop sa Prevention Restoration Order Beautification Enhancement (Probe) ang usa ka namaligya og prutas sa gidili nga dapit.
Kataposang kining nasikop sa North Reclamation Area. dakbayan sa Sugbo, diha sa sidewalk sa SM City Cebu niadtong Miyerkules, Nobiyembre 20.
Mao kini ang gibutyag ni Raquel Bohol-Arce, hepe sa Probe sa dakbayan sa Sugbo.
Dugang ni Arce, ang ubang vendors wala na mobalik sa mga gidiling dapit apan ang maong lalake giingong nag-inusarang nibalik sa pagpamaligya.
Apan si Mayor Edgardo Labella wala makauyon sa nahitabo komusyon tali sa operatiba sa Probe ug sa vendor sa maiging adlaw, Miyerkules, diin ang video gisaw-an sa social media.
Gumikann niini, gitahasan ni Labella si Atty. Rey Gealon, pangulo sa City Legal Office pagsusi sa maong insidente ug pagpahamtang og silot kon dunay sayop nga nabuhat ang Probe.
“That’s really not acceptable. I will let the City Attorney look into this matter and have an investigation,” padayag ni Labella.
Ang mayor nahibawo nga dili sayon ang trabaho sa Probe sanglit matag adlaw nilang ikahimamat sagad mao ang mga kabus nga Sugbuanon nga nanginabuhi daplin sa karsada apan kinahanglan nga ipahimutang usab ang ilang mga lihok.
Si Gealon niumol og three-lawyer team para maoy mo-imbistigar og motawag sa mga tawo nga apil sa komusyon ug mga saksi. PAC