Task force yape giumol

NIMANDO si P/Brig. Gen. Valeriano De Leon, direktor sa Police Regional Office (PRO) 7, ngadto sa Cebu City Police Office (CCPO) sa pag-umol og special investigation task group (SITG) nga motutok sa kasong pagpatay kang P/Lt. Col. Joie Yape Jr. niadtong Huwebes sa gabii, Nobiyembre 21, 2019 sa siyudad sa Sugbo.

Samtang, ang lawas ni Yape giuli na sa ilang dapit sa lungsod sa Jimenez, Misamis Occidental kagabii, Nobiyembre 22, sakay sa usa ka barko padulong sa dakbayan sa Ozamis.

Matod ni De Leon nga dili maayo nga naa na usab nibalik ang riding-in-tandem sa dakbayan nga gibasol sa pipila ka kaso sa pagpamatay.

Gimanduan na usab niini ang OIC sa CCPO nga palapdan ang ilang pagkuha sa mga impormasyon kalabot na sa pagpatay ni Yape.“Gitagaan na nako siya og instruction nga palapdan pa ang ilang impormasyon aron mahibaw-an nato kinsa kining mga gun for hire,” matod ni De Leon.

Si De Leon nagkanayon nga dako ang posibilidad nga ang motibo sa pagpatay ni Yape may kalambigitan sa iyang kanhi gihawiran nga kaso labi na nga nahimo siya nga labaw sa Provincial Intelligence Branch (PIB) sa Cebu Provincial Police Office (CPPO) kaniadto.

Apan dili pa una mabutyag sa kapulisan ang mga posibleng mihimo sa pagpatay sa pulis sanglit padayon ang imbestigasyon.

Si Yape opisyal ang iyang pag-ari sa Sugbu kay dunay gitambongan nga hearing kalabot sa ilang operasyon kaniadto samtang siya pa ang labaw sa PIB.

Si P/Col. Giovanne Maines, OIC direktor sa CCPO), nag-umol na sila og SITG aron madali ang imbestigasyon sa kaso, subay sa mando ni De Leon.

“Dili layo nga posibilidad nga dunay kalambigitan sa iyang trabaho sa una labi na nga na-assign ni siya sa PIB,” matod ni Maines.

Ang hearing nga gitambungan ni Yape didto sa Provincial Internal Affairs Services (PIAS) kabahin sa ilang giatubang nga kaso nga administratibo sa usa ka operasyon sa lungsod sa Medellin.

Ang maglangkob sa ilang giumol nga SITG ang mga unit lang una sa kapulisan sa CCPO lakip na ang Criminal Investigation and Detection group (CIDG) 7.

Ang asawa ni Yape, si Lovely Yape, kanhi Sanggunian Bayan Member sa unang distrito sa Misamis Occidental, maoy katapusang kuyog sa police officer.

Matod ni Lovely nga nahinabi sa Superbalita Cebu nga blanko pa siya kinsa ang nihimo sa pagpatay sa iyang bana sanglit nga sa probinsiya sa Sugbo nadistino ug ubay-ubay nga mga personalidad ang iyang nabangga sa wala pa kini nadistino sa ubang dapit ug sa kasamtangan sa Internal Affairs Services (IAS) sa Camp Crame.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph