ARON anaa ang kompiyansa ug luwas ang Davao City sa pagsaulog sa Pasko Fiesta 2019, gipakatag na sa Davao City Police Office (DCPO) ang mga pulis sa nagkadaiyang dapit ning dakbayan.
Sa impormasyon gikan sa DCPO pinaagi ni acting public information officer Police Captain Rosario Aguilar, gihimo ang send-off ceremony niadtong Huwebes, Nobyembre 21, sa DCPO parade ground.
“Kompleto ug hitsas na ang plano sa kapulisan sa DCPO alang sa mga nagkadaiyang assignment kon diin asa sila madestino sa pagbantay sa palibot alang sa atong seguridad karong Christmas season sa Davao City,” butyag ni Police Captain Aguilar.
Sama sa naandan ang DCPO mohimo og layer security diin asa una masudlan og tawo ang dapit asa gipahigayon ang mga kalingawan moagi pa kini sa makuti nga pagrekisa sa mga dala ug pag-kap kap.
Naa sab sa maong layer-security ang presensiya sa mga police auxiliary ug bisan ang kasundalohan pinaagi sa Task Force (TF) Davao.
Dili ikalimod sa hunahuna sa kadaghanan nga bisan og walay dagko nga kaugdahan ug selebrasyon hugot man gihapon ang seguridad sa Davao City. Lamang, sa miaging mga katuigan nalutsan gyud og bomba, hinungdan nga natukod ang Task Force Davao.
Ang natigayong Roxas Night Market Bombing, sa maong takna nagpasabot lang nga nahuyang ang seguridad, maong gipangkastigo sa kagamhanang lokal sa Davao City ang mga opisyal sa awtoridad.
Lagmit di na gyud kini mahitabo pa, kay halos gi-tripli ang seguridad, busa ning kapaskohan, dako ang kompiyansa sa katawhan.
Kudos sa awtoridad ning dakbayan. Magsaulog ang Dabawenyo sa Pasko ug Bag-ong Tuig nga puno sa kompiyansa, kalipay ug pagpasalamat sa grasya nga gihatag sa Labaw’ng Makagagahum.