COTABATO CITY -- Gipangunahan ni Maguindanao Second District Congressman Esmail Mangudadatu ang ika-10 anyos nga paghinumdom sa mangilngig nga masaker sa probinsiya niadtong Nobyembre 23, 2009.
Naghalad og bulak ug nag-ampo ang pamilyang Mangudadatu sa massacre site sa Sitio Masalay, Barangay Salman, Ampatuan sa nahisgutang probinsiya.
Uban sa magbabalaod ang mga sakop sa media ug mga pamilya sa uban pang mga nabiktima sa niluog nga pagpatay.
Nitambong sa misa sa kasumaran si Presidential Task Force on Media Security executive director undersecretary Joel Egco, mga langyaw nga tigbalita ug si Presidential Communications Operations Office Secretary Martin Andanar.
Una nang nibahad si Mangudadatu nga moluwat siya sa posisyon kung mapakyas nga makab-ot ang hustisya Maguindanao massacre.
Niabot og 58 ka tawo ang gipatay ug gilubong, apil ang 32 ka mga tigbalita, gamit ang backhoe sa maong lugar.
Si Mangudadatu hangtud karon nagbangutan pa gihapon sa kamatayon sa iyang asawa, mga kabanay ug mga taga-suporta.
Nanghinaut siya nga sa administrasyon ni Presidente Rodrigo Duterte ila na nga makab-ot ang tinuod nga hustisya sa mangilngig nga hitabo sa kasaysayan sa piniliay sa nasud. (Edgar E. Fuerzas)