NAKAHALUTAY ang St. Theresa’s College (STC) sa pagpanghudlat sa University of San Carlos (USC) aron langkaton ang titulo sa 8th SunStar Football Cup Girls 19 sa Cebu City Sports Center.
Ang STC nga mipalagpot sa Tagbilaran FC, 1-0, sa semifinals, milupig sa USC pinaagi sa penalties alang sa kampiyonato. Si Leah Birondo maoy napiling most valuable player (MVP) sa tinuig nga kompetisyon.
Gawas sa titulo, ang STC miuli usab nga may lima ka bag-ong bola sa football, kortesiya sa Anjo’s World, samtang si Birondo nakadawat og P1,000 savings account sa Sun Savings Bank.
Ang STC maoy nag-una sa Group 1 nga may 3-1 nga record human nila mapildi ang Southwestern University, 1-0, Brign Academy, 2-0, USOL, 1-0. Nakatabla usab sila sa Ormoc Soccer Association, 0-0.
Samtang ang Don Bosco Technical College (DBTC) A mipukan sa DBTC C aron dag-on ang youngest division players.
DBTC A, mitapos sa ikaduha sa Group 1 (2-1-1) mipalagpot sa Group 2 no. 1 Cebu International School (CIS), 3-2, aron makakuha og luna sa finals diin ilang gipatapsingan ang DBTC C, 1-0.
Si John Lerin maoy nahimong MVP.
Sa Players 9 division, ang bisitang University of San Jose-Recoletos-Balamban ang mipatigbabaw sa age group powerhouse teams alang sa titulo.
Ang USJ-R Balamban, nga nag-una sa Group 2, mitaktak sa Giuseppe FC, 1-0, sa quarterfinals ug gipakgang ang rally sa Springdale sa semis, 1-0. Sa finals, ilang gibuntog ang DBTC A, 3-1, alang sa kampiyonato.
Ang 8th SunStart Football Cup magpadayon karong Dominggo, Nobiyembre 24, diin ipahigayon ang mga duwa sa Players 13, Boys 15 ug 19 ug Men’s Professional Divisions. / JBM, ML