HUMAN sa duha ka sunodsunod nga titulo sulod lang sa pipila ka buwan, target sa bag-ong Cebu Schools Athletic Foundation, Inc. (Cesafi) men’s basketball champions Southwestern University-Phinma Cobras ang Philippine Collegiate Champions League (PCCL).
Kini maoy gibutyag ni coach Mike Reyes sa interview sa Superbalita.
Sayod si Reyes, manghod ni kanhi Gilas Pilipinas coach Chot Reyes, kon unsa ka lisod ang tahas nga iyang sagubangon batok sa mga dagkong teams didto sa Kaulohan.
Niadtong Biyernes, Nov. 22, ang Cobras nipilde sa defending champion University of the Visayas Green Lancers, 64-60 sa Game 3 sa ilang final series.
Apan alang kaniya nga dili kini rason nga moatras sila sa kombati ug gani dawaton kini niyang usa ka dakong hagit.
Dili bag-o ni Reyes ang pagsalmot sa PCCL sanglit niadtong 2014 nakarepresentar na usab sa Region 7 ang Cobras human kini makampiyon sa Cesafi.
Apan niadtong higayon, assistant coach pa siya ni coach Raul “Yayoy” Alcoseba.
“Our next goal is to compete in the PCCL. Pangalawa na ito, yung una panahon pa ni coach Yayoy (Alcoseba),”matod ni Reyes.
Giyagyag ni Reyes nga gikalipay niya og dako ug na overwhelmed siya sa kalampusan nga ilang naangkon.
Iyang giingon nga midagan una og tulo ka tuig ang pag-umol kaniya og usa ka championship team.
Matod niya, nga dihay higayon nga gibati na siya og kasagmuyo ug nakabaton na siya og pagduda sa sistema ug style sa iyang pag-coach.
“Pag two years ka na natatalo, doubts about my style of coaching starts to creep in,” padayag ni Reyes, kansang Cobras mao usab ang kampiyon sa Partner's Cup.
Apan subli niyang gipadayag nga ang presensiya sa iyang import nga si Thiam Lamine maoy dako kaayo og natabang sa iyang koponan.
Una nang gipadayag ni Reyes nga suwerte kanila ang paghiabot ni Thiam.
“Yes, sabi ko nuon pa, hulog nang langit talaga siya (Thiam). Hindi namin siya kilala, somebody told us lang about him. So, ang ginawa namin, pinapa-tryout lang,” matod ni Reyes sa unang interview.
“He is playing guard position, but he will defend against center. Yung dumating siya, we never change our style. He’s skills fitted to our system. Timing nga eh,” dugang ni Reyes.
Giangkon ni Reyes nga daghang key players nga mawala sa iyang team alang sa sunod season, ilabi na ni Randyll Roncal kinsa migradwar na sa iyang kurso, apan dako ang iyang pagtuo nga sa iyang sistema daghan pa ang mga sumosunod nga mosubang.
Hinuon magpabilin pa si Shaquille Imperial, ang iyang most valuable player (MVP) awardee. JBM