DIHANG nagsige pa ko og bike sa kabukiran, sagad sa akoang matindakan mga 50-70 kilometros. Usahay molapas og gamay. Hinuon, maghilak ang adlaw nga di ko makatindak. Nakatilaw ko og mga 100 kilometros apan, pabalik na ni. Di sab matawag nga straight ang akoang pagtindak.
Akong nabantayan nga mosobra na gani sa akoang naandan nga gilay-on sa pagtindak, mabikugan ko. Nahitabo ni nako few times na sa bukid, labina niadtong medyo mas layo ang akong pagtindak. Kana bang nakalitan ang akong lawas sa ka layo sa akong rota. Ako ning malikayan kon anam-anamon nako ang gilay-on sa pagsikad. Pananglitan, kon 50 kilometros ang gilay-on, kinahanglan una nakong abton ang 30 kilometro hangtod nga maabot nako ang full nga 50.
Kining akong gihisgutan base lang ni sa akoang kasinatian. Basin dunay sama nako og kahimtang, daling mabikugan kon makalitan ang lawas sa gilay-on sa pagatindakan. Akong tambag, anam-anama ang lawas, labina kon mangandam ka sa pag-apil og kompetisyon.
Duna ra bay mga tawo nga maayo kaayo mo-explain sa bikog. But, wa i-consider nga ang kada lawas sa tawo unique, lainlain og response sa usa ka kondisyon ug sitwasyon. Ang maayo nimo hayan di maayo sa imong kauban sa biseklita. Huna-hunaa, mas nakahibawo ug nakaila ka sa imong lawas.
MAKAPADAUT
Usa sa akong nakuhang benepisyo sa biseklita mao ang pagdaut nga way usbanay sa akoang diet. Sa akong pagsikad, naa ko sa 172 pounds. Sa sige nakong sikad kada adlaw, migamay ko ngadto sa 154-157 pounds.
Mas midako pa ang akong kaon kay gutom baya kon magpasingot ka. Ambot ang lawas mangitag fuel basta imo na kining gamiton sa pagpasingot. Iyang tapakan kon unsay mawala. Apan tungod sa kada adlaw nga pagpasingot, mius-us ang akong timbang.
Lisod lupigon ang biking sa ubang sports. Grabe ni maka burn og calories, labina kon mag-mountain biking ka. Ang moagas nga singot sa imong kalawasan, labina kon ikaw maudtuhan, maorag usa ka barel.
BATOK STRESS
Sa bisan unsa nga paugnat sa kusog, kon ikaw nag-antos sa stress, kani makapanagang kaayo sa epekto. Maayo ang response sa lawas kon ikaw panington. Mopagawas ang lawas og happy hormones nga makaayo sa imong feeling ug utok.
Ang stress, labina kon edaran ka, mopagamay sa imong utok kon basehan ang mga pagtuon. Busa, dinhi pa lang imo nang makita unsa ka importante ang exercise. Sa ako nang giingon, ang biking maanindot kay maora ra kag nagsuroysuroy while burning your fats and calories.
Nakabantay ka ba nga sa sige nimong pasingot, mitaas ang imong self confidence? Lahi ra ang feeling, di ba?