ANIA sila si Carlos ug Gloria karon sa simbahan sa ilang lungsod kay ilang gisaksihan ang kasal ni Raul ug Elena. Usa kini ka en grande nga kasal kay maoy gusto sa ginikanan ni Elena nga puslan mang maminyo ang ilang anak kinahanglan engrande gyud. Nasabot man sa ginikanan ni Elena nga makaya kaayo ni Raul ang galastuhan sa kasal. Sapian ang ginikanan ni Raul. Ang iyang amahan nagtrabaho sa gawas sa nasod -- sa London. Ang iyang inahan usa ka doktora nga dunay klinika sa siyudad. Ug si Raul mismo usa ka doktor. Amigo ni Carlos si Raul, ug si Gloria suod pod ni Raul.
Apan nahaigking si Carlos kay pagka human sa seremonyas sa kasal nilang Raul ug Elena nadunggan niya si Elena nga naghingos-hingos ug dayon mibakho. Naghilak kini.
“Glor, unsa man, may problema?” ni Carlos nga naiknat ang kilay “Naghilak man god ka.”
Wala motingog si Gloria nga nagpadayon sa iyang pagbakho. Migawas siya ug milingkod sa sementadong lingkuranan ilawom sa punoan sa ‘fire tree’ dili layo sa simbahan. Misunod si Carlos kaniya. Unya sa hinay nga pulong mitug-an si Gloria kang Carlos nga nagsabak siya. Mabdos siya ug si Raul maoy amahan sa iyang gisabak. Daw gikumot ang kailadman ni Carlos sa pagkabati niya sa gisugid kaniya ni Gloria. Daw dili siya makatuo, apan ang kamatuoran gipadayag kaniya ni Gloria mismo. Dihay kasina nga nabatyagan niya nga mikuyanap sulod sa iyang dughan. Hilom siya nga nahigugma kang Gloria, apan mirespeto lang siya kay nakigsuod man kini kaniya. Apan naunsa ba hinuon kini?
“Glor, unsa diay? May relasyon diay mo ni Raul? Unya, nganong wa man ka mobabag, o di ba, mosinggit dihang miingon ang pari kon wa bay mobabag sa ilang kasal sa di pa niya ihatag ang katapusang bendisyon sa balaanong sakramento? Nisinggit unta ka nga dili idayon. O di ba, ako imong gisugo nga maoy mosinggit. Dali ra man unta na, ug di unta mahinayon ang kasal nilang Raul ug Elena!” Dihay kalagot sa tuno sa sinultihan ni Carlos ngadtong Gloria. Pero didto sa iyang hunahuna, bisan mabdos si Gloria, ipadayon gihapon niya ang paghigugma niini. Ugma, iya kining daygan sa iyang gibati. Kon mosugot si Gloria, iya kining pakaslan. Total duna man siyay trabaho ug nakahuman na pod og kurso sa kolehiyo.
Unya gusto pod sa iyang Papa ug Mama nga makabaton na silag apo.
Naminyo gyud sila si Carlos ug Gloria. Ug sa pagpanglabay sa katuigan ang tulo nila ka anak nakahuman ra sa ilang mga pagtuon. Ang kinamaguwangan nga si Dindo (nga giisip niyang tinuod nga anak bisag si Raul ang tinuod nga amahan) usa na ka malampusong mechanical engineer. Sila si Tessie ug Ramil malampuson sab nga mga propesyunal. Pero taliwala ning tanan, may usa ka tinagoan nga sila rang duha si Gloria ang nasayod, nga usa ka higayon niana, niadtong dalaga pa si Gloria, nadisgrasya kini sa suod nga higala. Nagpasalamat si Carlos nga nabatyagan niya ang pagmahal ni Gloria kaniya sukad niadtong adlaw kanus-a sila gikasal. Gimahal usab niya kini luyo sa usa ka tinagoan nga siya nahimong ‘salvador del mundo.’ (KATAPUSAN)