KINING mga konsehal sa dakbayan sa Talisay wala na gyuy laing nahuna-hunaan nga ordinansahon. Ila gyud nga hasol-hasolon ang katawhan labi pa kadtong mahilamhigit sa minor vehicular accidents sa ilang dakbayan. Tiaw ba nimo, si Konsehal Ferdinand Rabaya nangamahan og usa ka ordinansahon nga ang drivers padad-on og kaugalingong marking materials sama sa chalk ug krayola aron sila mao nay magmarka-marka kon sila makasugat og minor vehicular accidents.
Gawas sa markings, ang mga nahilambigit nga drivers maoy mokuha og hulagway o litrato sa nahilambigit nga mga sakyanan. Kini aron kuno mapadali ang pagsulbad sa minor vehicular accidents. Kon madugay maugkat ang mga nagkabangga mga mga sakyanan mosangpot man god sa pagkabara sa trapiko ug daghan ang malangan. Maayo man tong dali kaayo ma-resulbar ang mga minor accidents kay mobalik dayon sa normal ang dagan sa trapiko.
Kon mapasar ang ordinansahon, multahan ang dili makadala og ilang marking materials ug ang dili makakuha og hulagway sa panagbangga. Sus, naunsa man tawo kining mga opisyal sa Talisay? Wala ba gyud silay lain nahuna-hunaan? Ila man hasol-hasulon ang katawhan sa ilang hinanggaw nga ordinansahon.
Kanang incident report importante kaayo na alang sa insurance purposes. Unya isalig lang nimo sa mga tawo nga walay kabangkaagan? Dili tanang drivers makamao sa traffic rules. Kon magkasabot dayon ang duha ka parties, walay problema kay puwede mag-lamanuhay lang. Apan naa may insurance nga mangayo og police report aron masuta kon kinsay sad-an. Unya duna kahay mangankon kon kinsay ang sad-an?
Kon ang problema sa taga traffic department sa Talisay mao ang dugay nga mag-ukang nga mga panagbangga, nganong dili man sila momugna og quick reposnse team aron moresponde sa panagbangga? Nganong ila o man gyud nga hasul-hasulon ang publiko? Bisan si Mayor Samsam Gullas dakong supak aning hinanggaw nga ordinansahon. Pangdokduka nang mga ulo anang imong mga konsehal diha, Mayor. (bobbygnalzaro@gmail.com)