OPISYAL na nga magsugod ang South East Asian Games 2019 karong Nobiyembre 30, 2019. Mao kini ang giingong ika-30 nga SEA Games ug ang host niini mao ang Pilipinas.
Tungod niini, nagtukod gyud og bag-ong venue alang sa sentro nga mga dula sa SEA Games diha sa Capas, Tarlac nga gitawag og New Clark City. Dunay swimming events sa Subic ug naa sab daw sa Metro Manila.
Karon lang bag-o, nitumaw ang isyo nga grabi kini ka mahal. Gani, overpriced pa, matod ni Senate Minority Floor Leader Franklin Drilon.
Lalim bay ang main torch tower nga murag gitungtong nga kaldero mokabat man og P55 milyones.
Naa kining maong “cauldron” gawas sa New Clark City stadium ug duslitan kini karong Nobiyembre 30. Magpadayon nga magsiga ang kayo sa maong cauldron hangtod mahuman ang maong SEA Games 2019.
Nagkanayon si Sen. Drilon nga kini makapatukod na unta og pipila ka mga tunghaan.
Gitawag sab og usa ka kongresista ang nanubra nga kamahal nga kaldero nga “Imeldific” kay nasusama kini sa mga excessive nga proyekto ni kanhi First Lady Imelda Marcos kaniadtong panahon sa diktadurya ni Marcos.
Gani, ang artist nag-design sa maong kaldero mao man si Francisco ‘Bobby’ Manosa, ang nag-design usab sa “Coconut Palace” sa panahon sa diktadurya ni Marcos.
Apan nidepensa si House Speaker Alan Peter Cayetano nga mahal man tuod, apan mao kini ang simbolo mismo sa SEA Games 2019 sa Pilipinas. Mas barato kini kay sa miaging mga simbolo sa SEA Games.
“It’s a work of art,” matod pa ni Cayetano. “We see the athletes. We see the burning flames that represent hope and the fighting spirit. We think it is just appropriate.”
Nidepensa pa gyud si Presidente Rodrigo Duterte nga ang maong proyekto walay pangurakot.
Bisan pa man, wala pa mahuman ang maong kontrobersiya apan kay karon na mang Sabado ang opening sa maong kalihokan, uyon ko sa desisyon nga ihiklin na lang una sa atong mga opisyal ang paglalis kabahin sa maong dakong budget.
Unya na nato kini tukion pagbalik inig human sa maong kalihokan. Apan kinahanglang tukion gyud ug dili na lang ipadaplin. Apan, dili nato mahimong rason ang maong kontrobersiya nga rason nga maoy nakapalangay ug nakapalawgaw sa pag-host sa Pilipinas.
Ug sulod sa sunod nga duha ka mga semana, atong makita kining maong cauldron kun kaldero. Ug duna lang akoy pangutana sa atong mga magbabasa.
Sa inyong tan-aw, work of art ba gyud kining maong cauldron? Rason ba kini nga kita makapasigarbo nga dunay usa ka iconic monument. O rason lang kini nga atong ikaulaw.
Palihog hatagi ko og feedback sa inyong hunahuna pinaagi sa email, sa text, o mensahe sa akong twitter.
@anol_cebu sa Twitter