MAHIMONG babaye o lalake ang pulong nga “hari.” Ang katugbang sa “hari” dili “rayna” kondili “hari” lang gihapon. Sa laing bahin, ang katugbang sa “rayna” nga gikan sa “reyna” nga usa ka Kinatsila nga pulong mao ang “rey.” Mao kini akong nakat-onan kang anhing Arsobispo Onesimo Gordoncillo, usa ka banggiitang maghuhubad sa Binisaya. Mao nga ang pulong “hara” sa pag-ampo “maghimaya ka hara” waya klaro.
Sa atong ordinaryong panabot ang hari mao gyoy magdumala sa iyang teritoryo. Kon sa usa ka gamayng kapunongan sa mga tawo, ang magharihari mao ang maghawodhawod sa maong pundok.
Lahi ang pagkahari ni Jesus kansang Solemnidad sa Cristo Hari atong gisaulog karong adlawa. Gilansang ang maong hari. Gibiaybiayan siya: “Giluwas niya ang uban, paluwasa siya sa iyang kaugalingon, kon kini siya mao ang Cristo sa Dios, ang Pinili.” Usa sa mga gilansang nga kriminal midugang pa gyod: “Dili ba ikaw ang Cristo? Luwasa ang imong kaugalingon ug kami.” Hari siya nga wala magpakita sa iyang gahom nga harianon.
Lahi ang nahitabo sa katigulangan ni Jesus nga si David. Mabasa diha sa ikaduhang libro ni Samuel nga ang mga tribo sa Israel miadto kang David didto sa Hebron nagkahiusa sa pag-ila sa pagkahari ni David sa Israel. Nindot ang sinugdanan sa paghari ni David.
Sa laing bahin dili kadudahan ang langitnong pagkahari ni Jesus diha sa sulat ngadto sa mga taga Colosas. Nagkanayon kini nga si Jesus ang pinalanggang anak sa Dios “ang dagway sa dimakita nga Dios, ang panganay sa tanang mga nilalang. Kay diha kaniya gibuhat ang tanang butang sa langit ug sa yuta, ang makita ug dimakita, bisan ang mga trono o pagdumala o pangagamhanan o gahom; ang tanan mga butang gibuhat pinaagi kaniya ug alang kaniya.”
Ang unang lakang sa pagtugkad sa kahulogan sa pagkahari ni Jesus mao ang mapaubsanong kinaiya nga gipakita sa maayong kriminal ngadto kang Jesus. Nagkanayon siya: “Wala ka ba mahadlok sa Dios kay ikaw usab ania sa maong silot? Ug kita angay lamang, kay nadawat nato ang tukma sa atong mga binuhatan; apan kining tawhana walay daotan nga gihimo.” Human niining mga mapaubsanong pulong, miingon ang tawo: “Jesus, hinumdomi ako kon moabot ka na sa imong gingharian.” Ang gingharian diay ni Jesus magsugod sa kasingkasing sa tawo nga buot mobalik sa Dios. Ug ang hari moingon: “Amen, sultihan ko ikaw, karong adlawa mahiuban ka kanako didto sa Paraiso.”
Si Papa Pio XI, nga maoy nagtukod sa Solemnidad sa Cristo Hari, naghisgot sa pagdumala ni Jesus sa atong mga hunahuna, kabubut-on, kasingkasing, ug lawas. Ang maong Solemnidad batok sa mga sayop nga pagtulon-an sa mga komunista, ateismo, ug sekularismo. Viva Cristo Hari! Mabuhi ka Hari!