DAKONG tabang sa mga kabos nga ma-admit sa Cebu City Medical Center (CCMC) ang one-stop shop sa pagkuha og hinabang.
Ang Cebu City Legal Office (CCLO) naningkamot nga ang CCMC makapatuman sa individual medical assistance program (IMAP) sa Philippine Charity Sweepstakes Office (PCSO) .
Si City Attorney Rey Gealon nisugyot sa konseho sa pag-apobar sa sugyot nga memorandum of agreement (MOA) tali sa CCMC ug Philippine Charity Sweepstakes Office (PCSO) alang sa pagtabang sa mga pasyente.
Ang IMAP maoy flagship program sa ahensiya sukad niadtong 1995 alang sa paghatag sa dinalian ug motubag sa pinansiyal nga panginahanglan sa pasyente, sumala sa website sa PCSO.
Uban sa the Guarantee Letter nga ihatag sa ospital nga ang ahensiya maoy motubag sa galastohan sa pagpatambal sa pasyente, lakip sa bayad sa ospital, dialysis centers, ug uban pa, dugang sa samang website.
Apan, ang tagtungod sa pasyente o pasyente mismo nga makalakaw moadto sa butahan sa PCSO aron pagtuman sa pipila ka rekisitos ug dokumento nga pirmahan.
Kon maduol sa ospital, sama sa tinguha sa CCMC, mas sayon na lang sa ilang pasyente sa pagproseso sa mga dokumento.
Pilay makuhang tabang?
Sumala sa website sa PCSO, dili kini pareho og kantidad tungod sa pagsuta sa klasipikasyon sa kabus nga pasyente sa iyang pagsud sa ospital.
Pananglitan, ang naa sa charity ward sa ospital sa kagamhanan ang pasyente, kini makadawat og 100 percent sa nagasto sa pagpaospital. Kon naa sa government hospital, kini makadawat og 90 percent.
Sa private charity ward, makadawat og maximum of 70 percent, dason sa PCSO. /JJL, RRM