PASIRAD-AN sa Cebu City Legal Office (CCLO) ang usa ka establisemento nga namalit og scrap sa dalan Palma, gumikan sa kakuwang og mga papelis sa pag-negusyo.
Si Atty. Rey Gealon, pangulo sa City Legal Office (CCLO, niingon nga subay sa kasayuran nga gipadangat ni Atty. Jared Limquiaco sa Business Permit and Licensing Office nga nag-operate ang Bohol Mag Metal and Scrap Buyer nga way registration, business permit sukad niadtong 2016.
Gawas niini, gipadayag ni Atty. Jigo Dacua, pangulo sa City Environment and Natural Resources Office, nga naisyuhan sa makadaghang higayon ang junk shop nga gidumala ni Alexander Aulestia.
“This scrap buyer is prominently littering its garbage by the roads of Palma St. corner S. Osmena Ave, across the side entrance of CTU MJ Cuenco Ave,” padayag sa closure order ni Gealon.
“For several years, the situation in the area has turned from bad to worst with more garbage in plain view to the detriment in health and sanitation of the community, including the residents in the area ad well as the students of CTU,” dugang sa desisyon.
Si Limquiaco nipadala na og show cause order niadtong Nobiyembre 8 ngadto sa nagdumala sa junkshop, apan inay atimanon ang problema sama sa pagkuha og mga permit nagpadayon kini sa iyang operasyon.
Sila si Gealon, Limquiaco ug Dacua nagkanayon nga kini maoy magsilbing pagtulun-an sa ubang establisemento hilabi na sa mga junkshop nga mosunod sa balaod.
Ang dakbayan seryuso sa pagpatuman sa business permit alang sa gitinguha nga buhis nga makolekta. / PAC