GITUOHANG naalaan nga sakop sa usa ka fraternity ang gipusil-patay niadtong Biyernes sa gabii, Nobiyembre 22, nga manindahay og sinugbang isda sa dalan Urgello, Barangay Sambag 1, siyudad sa Sugbo.
Si PMaj. Elizandro Quijano, hepe sa Abellana Police Station, nga nahinabi sa Superbalita Cebu niingon nga pila ka oras nga gitabang ang biktima nga si Juditho Amante, 39, nag-abang lang sa maong dapit ug lumad nga taga lungsod sa Talibon sa probinsya sa Bohol.
Matod ni Quijano, nga sa gihimong pakisusi sa iyang imbestigador ngadto sa pamilya sa namatay, nasuta nga posibleng naalaan nga sakop sa usa ka fraternity nga kon magpamiyembro, ang usa ka bag-ong na-recruit duna tahas nga ipatuman.
Dason ni Quijano, kon matuman ang mga bulohaton nga ihatag, una kini matawag nga hingpit nga miyembro ug grupo dunay ritwal nga himuon pinaagi sa pagpabaga sa piso nga kuwarta ug idul-it kini sa tungatunga nga bahin sa dughan.
Sa gidugayon, mahimo kining uwat sa dughan nga sinyales sa fraternity.
Nasayran ni Quijano nga ang biktima dunay uwat nga sama sa usa ka piso sa tunga sa dughan.
Apan ang mga igsuon sa namatay niklaro nga dili kini sakop sa frat ug ang iyang uwat daan na sa pagkabata.
Apan dihang gituohan nga sakop sa usa ka frat niresulta sa pagkabun-og niini sa iyang manghod.
Si Amante gipusil-patay pasado alas 6:00 sa gabii niadtong Biyernes, Nobiyembre 22, samtang nagpaypay sa iyang gisugba nga isda nga gi- order sa kustomer.
Ug kalit lang nga may nihunong nga motorsiklo sakay ang duha ka mga lalake.
Ang angkas sa motor maoy nipusil sa biktima.
Si Amante naigo sa bala sa armas sa iyang ulo ug lawas ug dali nga gisakay sa taxi sa iyang silingan nga anaa duol sa nahitaboan.
Gidala kini sa duol nga balay tambalanan. Apan pasado alas 12 sa kaadlawon sa sunod adlaw, Sabado, Nobiyembre 23, nabugtoan sa iyang kinabuhi ang maong biktima.
Apil sa gisubay sa kapulisan kon duna bay nakaaway si Amante sa wa pa mahitabo ang krimen. / BBT