HUMAN nigawas nga positibo sa surprise drug test, lima ka mga kawani ubos sa City Market Division sa Cebu City Hall ang ningluwat sa ilang katungdanan.
Wala na maghuwat sa confirmatory test ug pulos niangkon nga tiggamitan og gidiling drugas.
Ang surprise drug test gihimo sa Cebu City Office for Substance Abuse Prevention (Cosap) ubos sa pagpangulo ni Jonah John Rodriguez.
Ang Cosap nagsugod sa ilang serye sa surprise drug tests niadtong Nobiyembre 8 ning tuiga.
Matod ni Rodriguez, nipahigayon sila og drug test sa mga kawani sa Market Division niadtong Nobiyembre 12.
Si Rodriguez nagkanayon nga ang resulta sa drug tests ilang gipadala sa laboratoryo sa Manila alang sa confirmatory.
Apan, matod ni Rodriguez, ang lima nga nagpositibo wala na magpaabot sa resulta niini nga moabot human sa 30 ka adlaw gikan sa ilang pagpadala sa mga sample.
Sa lima, ang tulo niini job orders (JOs) ug duha ang casual employees. Si City Market Administrator Jonil Matuguina nakurat sa iyang nasayran gikan sa Cosap bahin sa lima sa iyang mga sakop.
Ang lima, diin mga ngan gipugngan ning mantalaan, giingong kabahin sa mga sinaligang kawani ni Matuguina.
“I was sad because they are those whom I trusted with because they immediately do what I asked them to do... But we have to let go of these people,” matod ni Matuguina.
Apan dihang iyang nahinabi ang lima, dason sa opisyal, pulos ning-angkon kini nga tiggamitan og drugas.
Mao kini hinungdan nga wala na lang usab kini pugngi ni Matuguina nga magpaabot una sa confirmatory test.