KAPIN sa P7 milyones nga balor sa shabu ang nasakmit sa buwag nga pagpangronda sa mga operatiba sa Pardo Police Station ug Philippine Drug Enforcement Agency (PDEA) 7 niadtong Biyernes sa gabii, Nobiyembre 22.
Unang duha ka dinakpan sa Drug Enforcement Unit (DEU) sa Pardo Police nga gipangulohan ni PMaj. Jhon Kareen Escober, hepe sa Presinto 7, mao sila si Marc Joseph Labrado, 24, ug Richard Liquin Gadiane, 28, pulos molupyo sa Sitio Isla Verde, Barangay Inayawan, siyudad sa Sugbo.
Matod ni Escober, ang operasyon gihimo tungod sa ilang unang dinakpan nga nitug-an nga iyang tinubdan sa druga mao si Labrado.
Wala na gitug-an ni Escober kon kinsa ang ilang dinakpan tungod sa hangyo niini kay nahadlok nga siya patyon, lakip na ang kontak niini kay ilang tun-an ang pakig-alayon aron madakpan.
Sa maong buy bust, nasakmit ang kapin sa usa ka kilo nga shabu gikan kang Labrado kuyog ang iyang sugosuguon nga si Gadiane.
Gibanabana nga moabot sa P7 milyunes ang kantidad sa shabu, base sa Dangerous Drugs Board (DDB) value.
Samtang, laing duha ang nadakpan sa PDEA 7 sa Sityo Lutaw-Lutaw, Barangay Santo Niño, siyudad sa Sugbo.
Si Leia Alcantara, tigpamaba sa PDEA 7, niila sa mga dinakpan nga sila Jack Branzuela, 31, ug Jhon Luis Daan, 26, pulos molupyo sa Sityo Salvador Barangay Tangke, dakbayan sa Talisay.
Nasakmit gikan sa mga suspek ang 100 gramos nga shabu nga gibanabana nga mobalor og P680 mil base sa DDB value.
Matod ni Alcantara, nga si Branzuela usa ka truck boy samtang si Daan iyang helper. Si Branzuela ang kasabot sa usa sa ilang mga ahente nga nagpakaaron-ingnon nga poseur buyer.
Ang mga dinakpan pasakaan og tukmang kaso nga kalapasan sa balaud batok sa gidiling druga ugma, Lunes, Nobiyembre 25. / BBT