GIHANDOM sa sakop sa prensa ang ika-10 nga anibersaryo sa Maguindanao massacre niadtong adlaw nga Sabado, Nobiyembre 23, sa Press Freedom, Velez street, ning dakbayan sa Cagayan de Oro.
Anaa sa 58 ka mga indibidwal ang gipamatay ug 32 niini ang mga sakop sa prensa.
Naglaom ang media nga unta makab-ot na ang hustisya alang sa mga biktima.
Gibutyag ni Uriel Quilingging, kanhi Presidente sa Cagayan de Oro Press Club (COPC), nga naglaom ang media nga maayo ang resulta sa promulgasiyon sa kaso karong Disyembre ug pabor sa nahabiling pamilya sa mga biktima.
"Crossing fingers is a symbol. Simbolo siya nga galaom ta nga maayo ang resulta nga favorable sa ato," matud ni Quilingging.
"Let's cross our fingers hoping for the best. Mao ang simbolo hoping for the best," dugang pa.
Naglaom si Pamela Jay Orias, tsirman sa National Union of Journalists of the Philippines (NUJP) sa Cagayan de Oro City og Misamis Oriental Chapter, nga dili na malangan pa ang desisyon nga hingpit na nga makab-ot ang hustisya pinaagi sa pagpahamtang og insaktong silot.
Nanghinaot usab nga masikop ang mga gawasnon pa hangtod karong panahona.
"Ang atong gilaoman nga dili na ma-delay ang promulgation or decision sa korte sa kaso para naa na gyud closure ang mga families nga nabiyaan," matud ni Orias.
Karong Disyembre 20, gitakdang desisyonan na sa korte ang mga utok sa maong makasaysayanong krimen sa nasud ug naglaom nga pabor kini ngadto sa mga biktima kinsa dekada na nga naglaom og hingpit nga hustisya.
Nagpahigayon og pagpangdagkot ang sakop sa prensa niadtong adlaw nga Sabado isip paghandom sa kamatayon sa mga biktima ug padayon nga pagpangayo og hustisya.