GIKAGUBTAN na usab ang executive order sa atong Presidente Rodrigo Duterte sa pagdili sa paggamit sa e-cigarettes kung “vape” smoking nga mao usab ang uso karong panahona, nga nahimong kakopetensiya sa sigarilyo.
Ambot bitaw sa kalisod sa atong panginabuhi karong panahona. Makagahin paman gihapon ang mga tawo sa pagsulod og bisyo nga bisag unsaon nato pagsumada, wala’y ikatampo sa atong maayong panglawas.
Panginterbyo ragud og mga chain smoker. Ingna og unsa’y ikatampo sa sigarilyo sa atong maayong panglawas.
Kadaghanan sa akong gipangutana duha lang ang tubag: wala, bisyo lang daw kuno. Ang uban mo ingon pud nga pangpalabay lang daw kuno sa kalaay. Ambot ug angay bang tuhoan kining ilang mga rason ug dili ba.
Kung imong tandi-on ang segarilyo ug bino, aduna pa kita'y makuha sa pag-inom og bino basta dili mosubra ug dili i-abuso. Kay ang bino, labi na kung red wine, good for the heart. Ang hard liquor pagpakondisyon sa serkulasyon sa dugo. Pero, ang pagpabuhot-buhot og aso sa segarilyo, wala gyud siya'y ikatampo sa atong maayong panglawas. Agree ba kamo?
Karon, gipun-an na pud? Usa kini ang electronic smoking pagpabuhot-buhot ug pagbuga sa aso nga murag panghaw sa barko. Kini ang nakapawag sa pagtagad sa atong presidente ug maoy hinungdan nga nagluwat og usa ka executive order nga dakpon ang mga tawo nga naggamit ini labi na kon kini diha sa publiko.
Sa pangkinatibuk-an, maayo ug gidayeg nato ang gibuhat sa atong presidente tungod kay gusto niyang proteksiyonan ang mas labaw pang gidaghanon sa katawhan nga mabiktima niini.
Good job, Mr. President. Mabuhay ka, kay imong giproteksyonan ang kinatibuk-ang katawhang Pilipino. Pero dili luto! Kay dili man balaod ang executive order, kung arestuhon sila sa atong mga pulis, kutob ra diha kay wala may corresponding penalty. Mabilanggo ba’g usa ka adlaw, duha, tulo o kaha mobayad lang og pipila ka pesos agi og silot?
Pwede sa matag lungsod o siyudad magmugna og lokal nga ordinansa kay adunay silot ang mga masinupakon, apan pipila lang? Mas maayo tingali nga ipasa kini ngadto sa kongreso aron mahimoan og klaro nga balaod ug adunay sundon nga silot ang mga masinupakon.
Tungod kay maanindot kini sa pagprotekta sa atong maayong panglawas, manghinaut lang kita nga mahimo kining Akta Republika nga did-an ang cigarette ug electronic smoking sa atong nasod kung tuyo man gyud nato nga proteksyonan ang panglawas.