DAVAO DEL SUR -- Gipadayag ni Senador Christopher Lawrence "Bong" Go nga suportado niya ang pag-ban sa vape ngadto sa mga pampublikong lugar.
Matod sa senador nga "prevention is better than cure" mao nga kung makadaot kini sa panglawas ug sa ubang makasimhot sa aso niini, angayan nga ibawal sa publiko.
Sa miaging semana, gideklara ni Presidente Rodrigo Duterte nga gidili na ang paggamit sa vape sa mga publikong lugar.
Milihok na sab ang Bureau of Customs (BOC) sa pagkumpiska sa mga vape human apil sa gidili ang importasyon niini.
Apan, daghang mga vapers ug mga negosyante niini ang mialma sa mando sa pangulo.
"Kung ikaw ayaw mong humaba ang buhay mo, wag mong idamay ang katabi mo," pahayag ni Go kinsa midason nga mas makadaot sa panglawas sa uban ang aso nga ilang masimhot gikan sa katapad nga nanigarilyo.
Ang pahayag sa senador giluwatan atol sa iyang pagbisita niadtong Huwebes, Nobyembre 21, sa managsilingang lalawigan sa North Cotabato ug Davao del Sur.
Gisaksihan sa opisyal ang paghatag og hinabang sa Office of the President alang sa mga lokal nga gobyernong naigo sa linog.
Dinhi sa lalawigan, gihatagan og ayudang pinansyal ang siyudad sa Digos, mga lungsod sa Bansalan ug Magsaysay. (OBD)