KIDAPAWAN CITY -- Giklaro sa lokal nga panggamhanan sa Makilala, North Cotabato nga wala sila'y mando nga pwede na nga makabalik ang mga molupyo sa mga barangay nga grabeng gitay-og sa linog.
Kini human mikatag ang taho nga gitugutan sa local government unit sa Makilala ang mga bakwit nga mobalik na sa Barangay Luayon nga gideklara nga “no build zone” sa Philippine Institute of Volcanology and Seismology (Phivolcs).
Gibutyag ni Municipal Administrator Sheryl Orbita nga gi-proseso pa sa gobyerno ang yuta nga himuon nga relocation site sa upat ka mga barangay sa lungsod sa Makilala.
Kinahanglan una nga susihon sa Mines and Geosciences Bureau (MGB) Soccsksargen ug Phivolcs kung luwas nga tukuran og balay ang puy-an sa mga bakwit sa linog.
Atol sa panagpulong sa mga lokal nga opisyal sa Makilala nga gipangulohan ni Mayor Armando Quibod nga dunay pamilya nga andam nga ipagamit ang ilang yuta nga temporaryo nga puy-an sa mga bakwit.
Gikomperma sab ni Barangay Luayon Barangay Kagawad Cornelio Damali nga dunay bakwit sa iyang dapit ang nakabsan sa kinabuhi gumikan sa bugnaw ug init sa evacuation sites ilabina nga sa yuta lang sila nangatulog.
Giplastar na sab sa mga ahensya sa gobyerno ang dapit nga tukuran sa mga temporary shelter sa mga pamilya nga grabeng naapektuhan sa linog. (EEF)