BANSALAN, Davao del Sur -- Human nabaniog ang wakwak ug sigbin, usa na sab ka tikbalang ang giingong nakit-an sa pipila ka molupyo sa ubang barangay sa lugar.
Gibutyag ni Mercy, 42, nga usa ka tikbalang ang ilang nakit-an sa Barangay New Cebu sa lugar niadtong Huwebes sa gabii, Nobiyembre 21.
Matod niya nga adunay ulo sa kabayo ang tikbalang, apan ang lawas niini sama sa usa ka tawo nga adunay duha ka kamot ug tiil.
Apan, nabulabog ang insidente human nakamata ang ilang mga silingan dihang miusig ang mga iro ug nakit-an ang tikbalang nga paspas midagan palayo sa lugar.
Nanaghap ang mga residente nga tuyo niini ang pagkarnap sa usa ka motorsiklo nga maoy tuyo sa nagpakaaron-ingnong tikbalang.
Dako ang panaghap sa mga residente sa lugar nga kawatan kini ug nagtakuban nga tikbalang.
Naalerto na ang katawhan sa lugar human nagpasidaan ang kapulisan nga modus sa mga kawatan ang magtakuban nga wakwak ug uban pang nilalang aron makahimo sa pagpangawat ilabi pa kun mahadlok ang uban nga mosusi sa mga kasikas sa palibot.