ATOL sa unang tigum sa kadagkuan sa Sinulog 2020 ug kapulisan gihatagan og konsiderasyon ang subling pagpawong sa signal sa cellphone atol sa dakong selebrasyon. Sama sa nangaging Sinulog ang cellphone kutob nalang sa pagkuha og picture ug video.
Nakita sa mga tigpasiugda ang dakong tampo sa pagpawong sa signal alang sa siguridad sa maing kalihukan. ituhoan nga ang mekanismo sa cellphone mahimong gamiton nga makapa ulbo sa bisan unsa nga device nga nga ikabit niini sa mga dautang tawo nga nagtinguha paghimo og kagubot.
Gawas sa pagpawong sa signal, wa na bay laing paagi nga sagopon nga di mahasol ang mga tawo nga nanginahanglan og signal sa ilang cellphone? Ang pagpalig-on sa intelligence network sa militar ug kapulisan di ba paigo pagsakbang sa yawan-ong tuyo sa mga terorista kung naa man gani?
Kini nga pangutana nitumaw gikan sa mga tawo nga dili komportabli sa kasinatian sa nangaging Sinulog diin ang paspas nga paagi sa komunikasyon mao ang signal sa cellphone.
Pero angay nga mahinumduman nga pagsugod sa seleberasyon sa Sinulog niadtong dekada 80, wa pa matawo ang cellphone ingon man ang internet. Sadya man gihapon ang pagparada sa nagkadaiyang contingent.
Kadtong nagsabot nga manuroy way gisaligan nga paagi sa komunikasyon gawas sa pagbayad og piso sa telepono nga ginegosyo niadtong mga panahona.
Ang akong mahinumduman ang mga sanga sa Ybañez News stand sa downtown area sa Cebu City may mga linya sa telepono nga magamit niadtong dunay gustong tawgon. Limitado hinuon ang mga tawag apan igo na kaayo ni nga makapadangat sa imong tuyo.
Kung wala ang imong gitawgan mahimo ra sab kang makapamalihug pagbilin sa imong mensahi sa nakatubag sa imong tawag. Dili hinuon paspas di sama karon nga ang imong tuyo nga ipaagi lang gani sa text diretsong modangat sa imong gitexan sa usa lang ka pamilok. Bisan pa man, nag-enjoy gihapon ang mga tawo bisan kong wa nila makontak ang gusto nilang ikauban sa pagpanuroy.
Ang uban mag-abot ra gihapon sa usa ka lugar bisan kong wa magsabot taliwala sa mabagang duot sa katawhan.
Kung naa pa texting kaniadto, mahimong pasidan-an nimo ang imong mga higala nga magtabon daan sa ilang nawong sa may Colon area kay naay mga tawo nga namahid og takuling sa nawong. Mao man ni uso kaniadto matag Sinulog di ba?
Basi sa kasinatian di na kita aproblema sa subling ipatuman ang pagpawong sa signal sa umaabot nga Sinulog.