USA ka politiko naligo sa usa ka beach resort sa syudad sa Lapu-Lapu. Samtang nalingaw nga nagsawom-sawom sa tin-aw kaayo nga dagat, nakakita siya og usa ka botelya nga naglutaw-lutaw. Pag-abli pa niya, nigawas ang itom ug bagang aso nga naporma og usa ka genie.
Giingnan sa genie ang politiko nga hatagan niya kini og usa ka wish agi og pasalamat sa pagpagawas gikan sa botelya. Nahuna-hunaan sa politiko ang dugay na niyang gipangandoy nga proyekto–usa ka tulay nga magdugtong sa lalawigan sa Sugbo ug Bohol.
Apan nibalibad ang genie. Di kaya kay lisod na paghukag bas ug graba kay gipaundang ang pagpanguykoy sa bas ug graba sa mga kasapaan. Busa gipapangita na lang og laing wish. Niingon ang politiko nga gusto niya nga maundang na ang pangurakot sa gobyerno. Matod pas genie, “Labaw pa nang lisod. Maghimo na lang kog tulay oy.”
***
Apan lisod gyud diay ang pagtukod og tulay nga magkonektar sa Cebu ug Bohol, ang pagatawgon unta og Cebu-Bohol Friendship Bridge. Ang mga kadagkoan sa Department of Public Works and Highways (DPWH) 7 niingon nga di feasible ang proyekto.
Ngano man? Lawom kaayo ang dagat taliwa sa duha ka mga isla. Ug wa pa ang teknolohiya nga gikinahanglan sa paghimo niini. Gawas sa teknikal nga hinungdan, ang maong tulay mokostar og mokabat sa P58 bilyones nga pangitaunon pa.
Si Economic Planning Secretary Ernesto Pernia namahayag nga mao kini ang hinungdan kon ngano nga ang Cebu-Bohol Friendship Bridge usa sa mga dagkong proyekto nga gihiklin lang una.
***
Ang 24.5 ka kilometro nga tulay unang gisugyot ni kanhi gobernador ug kongresista Erico Aumentado sa Bohol. Gihingusgan usab kini sa iyang anak, ni Bohol Rep. Erico Aristotle Aumentado.
Gihulagway kini ni Aumentado nga “three-in-one bridge” nga magsumpay sa Cebu-Cordova Bridge sa lungsod sa Getafe, Bohol. Mao unta kini ang agian sa kable sa kuryente gikan sa Cebu paingon sa Bohol ug tubo nga sa tubig gikan sa Bohol paingon sa Cebu.