DILI lalim ang kahimtang sa mga dayber sa public utility vehicles (PUJs). Mayoriya sa ilang sektor maisip nato nga kabus. Naa sa kakha-tuka nga pagkamas sa panginabuhi. Apan maayong sektor sa kabus tungod sa ilang dakong partisipasyon sa pagpatuyok sa lokal nga ekonomiya pinaagi sa pagmasada matag adlaw ubos sa bisan unsang kondisyon sa panahon, naglagting nga kainit sa adaw o nagbunok ang uwan. Dili pwedeng mohunong aron pamilya dili magutom.
Ang ilang lahimtang mahimong makomplikado kon dunay masakit nga sakop sa pamilya, labi na kon mismo ang drayber nga bugtong gisaligan sa panginabuhi mao ang maapektohan. Makaluluoy pero mao kini ang matuod nga sugilanon sa kasagarang drayber. Usahay, bawion na ang ilang pagbati sa mensahe sa sticker nga ipapilit sa ilang sakyanan nga “Basta driver, sweet lover.”
Sa lakang sa hingpit nga pag-phase-out sa PUJs sa 2020 o sunod tuig nunot sa modernization program sa kagamhanan nakapabalaka og dako sa atong mga minahal nga drayber. Unsa na lang ang ilang kaugmaon. Dunay tanyag ang kagamhanan nga alternatibo o pautang apan, ang eskima sa pagbayad mas nakapabor sa mga medyo dagkong operators sa PUJ. Ang yano nga drayber nagpanagana.
Sa pikas babin ug sa patas nga pagtan-aw sa kinatibuk-ang kahimtang sa transportasyon, kinahanglan na usab nga mouswag kita sa unahan sakay sa modernong panahon. Matuod usab nga dili lang bati tan-awon ang kaganggang nga PUJ, sagad hinundan sa trapiko human daling madaut sa tungatunga sa dan.
Sa pagpaladong, maayo nga ang pagtuman sa programa dunay kasingkasing ug pagliking pabor kanunay sa kapalaran sa mga kabus. Busa, dakong hangop ug pagdayeg ang ulahing ‘win-win solution’ sa Department of Transportation (DOTr) nga makapadayon ang karaang PUJs sa pagbiyahe apan kinahanglan mopasar sa Motor Vehicle Inspection System (MVIS).