MAGAMIT na ang 21 ka mga bag-ong garbage compactor truck sa Cebu City Government sunod semana, dul-an usa ka buwan human sa gipahigayon nga turnover.
Si Engr. June Maratas, pangulo sa Department of General Services (DGS), nagkanayon nga niadtong Nobiyembre 19, ang Hino Philippines naghuwat nalang sa Government Services Insurance System(GSIS) nga mo-release sa insurance 21 ka unit.
Kon ila nang makuha ang mga dokumento gikan sa GSIS nga maoy insurer sa mga government vehicles, ang mga Papel iduso na sa management sa Hino ngadto sa Land Transportation Office (LTO) para makuha ang Certificate of Registration ug Official Receipt nga maoy gikinahanglan para makadagan na ang maong mga compactor.
Si Engr. Joel Biton, pangulo sa Department of Public Services (DPS) nagkanayon nga dugay ra silang nagpaabot nga magamit na ang maong mga bag-ong ekipo aron maka-daginot na ang City Government sa operasyon sa paghakot sa basura.
Gawas niini, mahakot na usab sa hustong oras ang mga basura nga naa daplin sa karsada sa lain laing urban barangays nga kanunay gireklamo sa mga residente.
Sa pagkakaron, ang City Government ni kuha sa serbisyo sa Jomara para maoy motabang og hakot sa basura gikan sa mga barangay sanglit dili maato og kuha sa 11 ka mga garbage truck gikan sa DPS.
Si Mayor Edgardo Labella nagkanayon nga gumikan sa presensiya sa bag-ong mga ekipo, gitun-an karon nila ang paghunong sa pagkuha sa serbisyo sa private service provider para makadaginot ang City Government og P50 milyones matag tuig sa paghakot sa basura gikan sa karsada paingon sa transfer station. (PAC)