USA ka tinun-an sa B.S. Information Technology (BSIT) ang nanglungkab sa usa ka automotive repair office sa Barangay Cabancalan, dakbayan sa Mandaue niadtong Sabado Nobiyembre 23, 2019 aron makabayad sa tuition.
Ang dinakpan mao si John (ngan gipugngan ning mantalaan) 21, nagpuyo sa Barangay Cabancalan, siyudad sa Mandaue.
Matod ni PSSG Richard Cabello, imbestigador sa Police Starion 4 sa Madnaue City Police Office (MCPO), nakadawat sila og taho sa 9:00 sa buntag gikan ni Charlyn Sencil, secretary sa naasoy nga opisina, nga gilungkab ang ilang buhatan ug nawala ang kuwarta nga pangsuweldo sa ilang mga kawani.
Daling nipahigayon og imbestigasyon ang kapulisan sa maong opisina.
Atol sa imbestigasyon, nahibal-an pinaagi sa mga fingerprint, nakit-an nga ang suspek nisulod sa kasilyas sa opisina pinaagi sa pagkuha sa jealousie glass sa bintana sa kasilyas.
Ang suspek misulod sa opisina ug gikuha ang kwarta sa lamesa sa manager. Nigawas kining maong suspek sa sliding window sa opisina.
Ang pagpanglungkab gituohan nga nahitabo sa gabii niadtong sa Biyernes, Nobiyembre 22.
Ang suspek nailhan pinaagi sa usa ka menor de edad, kansang ngalan gipugngan, kinsa nakasaksi nga ang suspek misulod sa bintana sa kasilyas.
Matod ni Cabello, ang tag-iya sa automotive shop nga naghatag og puy-anan duol sa opisina para sa iyang mga empleyado, diin nagpuyo usab ang testigo ug ang suspek.
Ang igsuong babaye sa suspek nagtrabaho sa maong opisina apan giklaro ni Cabello nga ang igsuon sa suspek walay kalabutan sa krimen.
Human nailhan ang suspek, gisikop dayon sa pulisya ang suspek niadtong Sabado, Nobiyembre 23, sa alas 4:30 sa hapon.
Dugang ni Cabello, unang gihimakak sa suspek ang akusasyon hangtod nga gipangutana kini siya sa tag-iya ug mitug-an na kini sa iyang nabuhat nga krimen.
Gikompirmar usab sa 21-anyos nga gibuhat niya ang maong pagpanglungkab aron pagbayad sa iyang tuition ug nangayo kini og pasaylo sa nagdumala.
Narekober sa pulisiya ang P120,483 gikan sa suspek sulod sa belt bag nga iyang gipalit gamit ang salapi nga gikawat.
Karon, ang suspek anaa na ubos sa kustodiya sa MCPO Station 4. (B)