DUNAY kalabotan sa iyang pagkapulis ang usa sa hinungdan sa pagpusil-patay sa kanhi hepe sa Provincial Intelligence Branch (PIB) sa Cebu Provincial Police Office (CCPO) nga si P/Lt. Col. Joie Yape Jr.
Giingong adunay politiko sa probinsya sa Sugbo ug mga pulis nga giingong gikabangga niini sa dihang hepe pa kini sa PIB apan wala kini nganli sa hepe sa kapulisan sa dakbayan sa Sugbo.
Niadtong Nobiyembre 21, 2019, gipusil-patay sa nagbinugtong nga gunman si Yape sa dalan Molave, barangay Kamputhaw sa siyudad sa Sugbo.
Matod ni Police Colonel Geovanie Maines, officer-in-charge sa Cebu City Police Office (CCPO), aduna pa silay laing motibo sa krimen apan nagpadayon pa sila sa ilang imbestigasyon.
Apan usa sa iyang gitug-an nga daghang mga kaso nga giatubang si Yape sa Sugbo sa dihang siya pa ang hepe sa PIB ug lakip na ang giingong paglambigit niya sa ubang pulis sa illegal nga kalihukan nga matod niya dili tinuod.
Gawas sa iyang mga kaubang pulis nga iyang nabangga sa nanglabay nga mga katuigan aduna matod pay politiko sa probinsya sa Sugbo nga iyang nakontra nga wala lang una nganli ni Colonel Maines.
Naa na sa ilang kustodiya ang duha ka ka kopya sa CCTV footage apan nagkinahanglan pa kini nga i-enhance sa PNP Regional Anti Cyber-Crime Unit 7 tungod kay dili kini kaayo maklaro.
Usa sa ilang gusto nga maklaro ang plate number sa motorsiklo nga gigamit sa nagpaabot nga driver nga gisakman sa gun man human niya ma pusili si Yape.
Hanap ang video nga ilang nakuha sa crime scene apan nangita pa silag laing mga CCTV camera nga naa duol sa dapit diin nahitabo ang pagpamusil.
Si P/Brig. Gen. Valeriano de Leon, direktor sa Police Reginal Office (PRO) 7, dili lang una mohatag og timeline sa iyang mga pulis e nga nag kupot sa imbestigasyon ni Yape.
Apan iyang gimandoan si Maines nga dalion palawman ang imbestigasyon alang sa pag ila kinsa ang naghimo sa krimen.
Dugang ni de Leon nga posibling gun for hire ang nagbira kang Yape tungod sa pamaagi sa pagpusil niini.
Aduna na silay saksi sa pagpusil apan wala matod pa kini makakita sa dagway sa gun man ug sa driver sa motor nga maoy gisakyan human pusila ang pulis.
Niadtong Biyernes, Nobiyembre 22, hapon gidala na sa Mindanao agi sa puwert sa Ozamis City ang lawas bnu Yape sa lunsod sa Jimenez, Misamis Occidental. (AYB)