ANDAM na si Manny Pacquiao (MP) Promotions fighter “Nightmare” Marlon Tanan Tapales batok ni Filipino Assassin Ryosuke Iwasa alang sa 12-round interim International Boxing Federation (IBF) Super Bantamweight (122-lb) title.
Ang sangka ni Tapales batok Iwasa maoy top supporting bout sa pagdepensa ni American WBC Middleweight champion Jermell Charlo batok Irish Dennis Hogan karong Disyembre 7, 2019, Sabado (Domingo PH Time) sa Barclays Center, New York nga gidalit sa TGB Promotions nya isalida sa Showtime cable television.
Malisod nga dalan ang subayon ni Tapales ning higayona sukwahi sa nangagi niyang away sa US nga yano niyang gipildi ang mga kontra tungod kay gawas nga beterano taas sab niya kini si Iwasa.
Hinuon ang 27 anyos nga native sa Kapatagan, Lanao del Norte nga si Tapales (33W-2L, 16KO) nga nahinabi sa Superbalita via chat online nagplano nga moburak kutob sa iyang mahimo aron magmalampuson.
“Andam nako sa umaabot nga away, importante kaayo ni nako nga fight kay mao ni ang dalan sa kalampusan para mahibalik ko sa pagka world champion”. matod ni Tapales ang former WBO Bantamweight world champion.
“Under ko sa MP Promotions, apan mao gihapon akong manager Rex “Wakee” Salud. Taas ug abtik akong kontra si Iwasa busa kinahanglan ko moduol niya kanunay para makakuha ko’g maayong angle masulod nako siya” Panapos ni Marlon ang anak sa magtiayong Emilio ug Maria Tanan Tapales.
Sa pikas bahin ang gikan sa Kashiwa, Chiba, Japan nga si Iwasa, 29 anyos, 5’7 1/2 ang height, walhon sab (26W-3L, 16KO), IBF rated number 1, madasigon nga ikabagat si Tapales ang ika-11 nga Filipino boxers niya nga kontra.
Sa miaging napulo ka mga pinoy fighters nga nabangga ni Iwasa ibabaw sa ring walay gipili walay gipasaylo kuridas nga gipildi niya sila si Glenn Medura (TKO3), Dennis Tubieron (KO7), Marlon Arcilla (TD5), Ricardo Roa (TKO2), Ernesto Saulong (UD), Richard Pumicpic (MD), Jecker Buhawe (UD), Mark John Yap (UD), Jerope Mercado (UD) ug Marvin Tampus (UD).
Samtang ang chief trainer ni Tapales nga si former WBC 108-lb champion Rodel Generalao Mayol nga nakontak sab sa Superbalita walay puas nga nangitag bangag nga madag-an sa iyang boxer.
“Three months iyang stay ug training diri ni Marlon sa US mao nga nindot iyang condition karong panahona. Gipahait pa sa lain-laing sparring sessions busa lima ka training facilities among na ensayohan gikan sa Wild Card Gym, Bones Adams Gym, Capetillo Gym, Top Rank Gym ug sa Combination Gym ni Marvin Somodio” matod ni Mayol ang nailhan nga Batang Mandauehanon.
“Kini si Iwasa maayo ni sa long distance fight unya naa ra sa atubangan nimo dili modagan busa walay kumpyansa mi ani ni Marlon. Kinahanglan modaug si Tapales ani nga away mao nga among pangingkamotan para manimalos mi sa sunod sunod nga kapildihan sa mga pinoy boxers sa nangaging buwan sa Amerika” Bigtime nga birada ni Mayol.
Ang modaug sa Tapales batok Iwasa maoy mandatory challenger ni American unified IBF ug WBA Super Bantamweight world champion “The Baby Faced Assassin” Daniel Roman (27W-2L-1D, 10KO).
Si Senator Manny “Pac-Man” Pacquiao nagtinguha unta pagsaksi sa away sa iyang boxer nga si Tapales apan gumikan sa trabaho sa Senado busa nanawagan nalang kini sa mga boxing fans nga mga Filipino-Americans labina sa Filipino-New Yorkers ug Filipino-Brooklynites sa linawas nga pagsaksi sa Tapales versus Iwasa sa Barclays Center ang home court sa Brooklyn Nets sa NBA. (Daniel Quindao Guden, US Correspondent)