Sugilanon: Way sipyat sa taghap

SADYA kaayo ang mga bata nga nanagduwa diha sa buntoran sa ka Doro-Peping ning panahon sa ting-init. Dunay nanagtabanog. Naay nagduwag kasing. Wa mawala sa pundok nga ni Poy Titoy pa, ang lima ka butsokatoy nga sila si Beterbo, Artemio, Sergio, Vener ug Cirilo. Suod silang managhigala. Mga sipat kaayo sila ug mosamot kadadya ang pundok kon naa sila.

Sila si Beterbo, Artemio ug Sergio kanunay magdala sa ilang mga subing (kitara) nga bagol nga kalingawan nilag kaskas. Ug di sab mawala nilang lima ang tirador, kay hilig man sab silang manirador og langgam. Apan nilang tanan, si Beterbo butalo kaayo sa panirador. Maayo lag makataghap, makaigo og tamsi o di ba, tagmaya.

Hangtod nga nangadagko na sila ug mga ulitawo na. Nagpabiling butalo si Beterbo sa panirador. Butalo sab siyag panagway kay dili guwapuhon. Apan ang ilang panag-amigo wa molubad.

Usa ka higayon nagkasabot ang mga butsokatoy nga manabo sa Kalapayan, silingang balangay sa ilaha,. Tabo didto nianang adlawa. Ang tulo ugod kanila may naibgan mang dalaga sa maong dapit. Ang nakaapan kay usa ra ka babaye ang ilang gitutokan. Busa nagpahinumdom na sab sa Vener nga nagkanayon, “Ayaw gyud ninyo gub-a ang atong panaghigalaay nga nalatid sukad pa sa atong pagka bata. Tungod lang unya kang Senia basig mahagtos ang talikala sa atong panaghigalaay!” “Dili gyud, uy!” matod pa sa tulo. Nag-apir pa ang mga karaho.

“Lagi. Esport lang god. Way suk-anay,” sagbat ni Cirilo.

USA ka gabii niana dihang mipauli na si Senia gikan nga naninda sa taboan nanguyog ang lima sa panimalay sa dalaga. Si Vener ug si Cirilo maoy milingaw sa pakighinabi sa ginikanan sa dalaga. “Unsa man, tinud-anay nang inyong gugma?” miingon si Senia. “Mangasawa gyud mo nako?”

“Oo, uy! Bisan ugma dayon mamalaye mi!” nagdungan pagtubag ang tulo.

“Unsa, kamong gyung tulo? Kuyawa god!” nakapanguros si Senia. “Maugtas man sab ta ana!”

Nagtinan-away ang tulo. “Aw, ku...kuan ba, ki-kining...” nagkabungabunga si Sergio.

“Ang maayo niini, aron makanunayon ang inyong panag-amigo, tagaan ta mog tahas.” Gisid-ing ni Senia ang tulo ka maghahalad. “Misiga man god ang inyong mga mata!” ni Senia nga nagpasiaw.

“Unsa mang tahasa?” sakgaw ni Artemio.

“Ang di makatuman sa tahas,” padayon ni Senia, “duko lang sa ulo ug magpaawot, ha? Way kasuk-anay!”

“Okey!” sanong sa tulo.

“Ania ang tahas. Dad-i ko ninyog langgam nga manatad. Buhi kon patay, basta manatad. Ang unang makatunol niini ngari nako maoy makadawat sa ganti, ang akong gugma. Sugot?”

“Sugot molang! Subra pa sa sugot!” tubag nilang Sergio ug Artemio. Si Beterbo wa dayon katingog. Apan pagka taudtaod miingon siya, “Kaidlas ra ba anang langgama!” Unya miyango siya.

Sa misunod nga mga adlaw nagsuplaag ang tulo, iyahayg pangita og manatad dala ang ilang mga tirador.

Usa niana ka adlaw nangumpay si Beterbo alang sa iyang kabaw. Kalit lang may mibaguros ibabaw sa iyang ulohan. Nahaigking siya ug nakaingon, “Uy, manatad!” Iyang gilantaw ang gipadulngan niini. Mitigsop kini sa naglabong nga mga dahon sa tugas sa unahan. Mainampingon siyang miduol sa punoan sa tugas. Giandam na niya ang tirador.

Sa taudtaod niyang pag-aninaw nasigpatan niya ang manatad. “Maayo untag ako ning mataghapan da.” matod niya sa hilom. Iyang gituthoan ang iyang tudlo ug gikurosan ang bato nga gibala sa tirador dayong bingat niini. Ug...PAK! Naigo ang langgam. Gidali niya pagduol ang nahulgan niini. Iya kining gisagpo kay buhi pa man. Nagmaya ang iyang galamhan, ug morag giluparag buntog ang iyang dughan.

Giadto dayon ni Beterbo si Vener ug si Cirilo didto sa buntorad nga nagdala sa manatad. Unya mipadayon siya lahos ngadto sa ilang Senia. Gibalitaan sab niya sila si Artemio ug Sergio bahin sa pagdakop niya sa manatad. Nahasiga ang mga mata nilang Artemio ug Sergio samtang nagtinan-away.

“Nataghapan gyud ni Bay Beterbo ang manatad ug ang kasingkasing ni Senia,” matod ni Vener. “Way sipyat sa taghap!” tuaw ni Cirilo. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph