NALINGAW ko nga gimingaw nagtan-aw sa mga throwback episode sa TV show nga “Kakabakaba” nga gibalik og pasalida sa GMA News TV niadtong Dominggo sa gabii.
Mga teenager ug mga slim pa kaayo silang Richard Gutierrez, Angelika dela Cruz, Chynna Ortaleza, Angel Locsin ug Chubi del Rosario nga kanhi loveteam ug first boyfriend ni Anne Curtis sa panahon sa ilang youth-oriented TV show nga TGIS niadtong 1995.
Wa nako tuyoang nanumbalik usab ang mga kagahapon dihang bata pa si Chubi ug gakson-gakson pa ni siya sa akong mama ug papa basta makabisita sila sa ilang balay sa Manila.
Dihang namatay ang akong mama wa nila pahibaw-a ang Lola Bessie ni Chubi (sa mother side) sa kahadlok nga basin maunsa ni tungod sa ilang kasuod.
Kay ang lola ni Chubi ug ang akong mama mao ray bugtong nabuhi sa pito ka managsuon human sa ikaduhang giyera sa kalibutan ug hangtod nga nagdalaga sila nahimo nilang bugtong dangpanan ang usa’g-usa.
Ang kagikan sa akong mama mga mikine sa Tarlac, Pampanga. Samtang ang akong papa lumad sa San Pablo, Laguna. Pero ako sa Cebu na natawo ug nagdako.
Nitaliwan ang akong mama Nov. 29, 2001. Paglabay sa pila katuig nisunod usab ang iyang igsuon nga mao ang lola ni Chubi.
Nangamatay sila nga wa gani nagka-estorya o nagkakita sa katapusang gutlo sa ilang mga kinabuhi. Wala pa to'y social media sa una.
Mao nang basta makakita ko aning Chubi di kalikayan nga maora kog mag-nostalgic kay kadtong 5 years old pa lang ko nakapuyo sad ko sa balay ni Tiya Bessie sa Manila nga generous kaayo sa akong mama.
Sorry sa mommy Lorna ni Chubi kay nihangyo ra ba ni siya nako sa una nga kon mahimo di lang nako suwaton nga akong pag-umangkon si Chubi kay kalkalon unya kuno sa media.
But that was before nga sikat pa si Chubi. Di man sad magsakit akong tiyan kon di sila moila nako nga paryente.
Pero kon di pa sad tingali ingon ana ka overprotective ang mommy ni Chubi basin buhi pa hangtod karon ang career sa iyang anak. Sayang.