Mongaya: Abibahan nato atong mga atleta

TUNGOD sa bagyo sa mga saway tungod sa hinanggaw nga mga sipyat sa organizer niining South East Asian Games 2019 dinhi sa Pilipinas dihang nangabot ang pipila ka mga atleta gikan sa atong silingang nasud, napugos sa pagpangayog pasaylo mismo ang Malakanyang.

Nalipay kita nga wala diay pasagda-i sa atong mga kadagkuan kining mga sipyat sama sa kalangay sa pagkuha sa football team sa East Timor dayon gihatod sila sa sayop nga hotel.

Pipila ka oras sab nga naghulat sa airport ang mga atleta sa Cambodia ug Myanmar.

Mga sipyat kini nga bisan pa man sa kalisud sa traffic ug pag-usab sa schedule sa arrival sa team, dapat wala unta mahitabo.

Bisan na lang dunay sakop sa SEA Games organizing committee nga nag-una na sa airport. Unta, duna na gyuy committee nga nag-atang na sa airport ug nag-coordinate sa mga sakyanan ug mga hotel.

Kon duna may kakulian, dunay command center nga maka-ateman dayon.

Kadako sa budget nga gigahin unya di makakuhag tawo nga makamao mo-handle og ingon niini nga sitwasyon?

Di ra ba gyud malimtan nga bag-o lang nakalusot ang budget sa SEA Games ug kining cauldron nga maoy pasigaan, moabot og P55 milyones. Murag giuna ang kwarta diin dunay dakong komisyon.

Basi sa atong gisulat sa miaging kulom, angay lang gyud sawayon ang excessive budget. Unya inig human sa SEA Games, tukion dayon kon nakuha ba ang atong tumong ug importante nga matuki kon wala ba binuangi ang atong pundo.

Lain pa nang kakulang sa training sa atong mga atleta ug ang politika diha sa sports.

Bisan pa man, sakto lang nga si Presidential Spokesman Sal Panelo mismo ang mangayog pasaylo niining mga sipyat in behalf sa Pilipinas. Makaulaw oi. Arang-arang na lang gyud kining pagpangayog pasaylo.

Internally, angayan nang sesantehon ang tawo nga nagtanga lang ug ilisan adtong makamao ug abtik.

Karon, angay lang nga maghiusa kitang tanan aron moabiba sa atong mga atleta.

Naa gipahigayon sa Pilipinas ang SEA Games ug bentaha sa atong mga atleta kining giingong homecourt advantage.

Kining homecourt advantage mao ang makabungog nga abiba gikan kanako sulod ug gawas sa mga sports venue.

Pareho gud na og motan-aw kitag duwa sa team sa atong tunghaan batok og team sa laing tunghaan. Di ba moabiba kitag maayo sa atong team bahala na og atong kuyog sa pag-abiba mao ang atong kompetensiya sa politika sulod sa tunghaan?

Pareho gud na og moabiba kita kang Manny Pacquaio dihang duna kiniy mga duwa batok sa kampyon sa laing nasud.

Kon buot hunahunaon, kining sports usa sa mga pamaagi sa paghiusa sa katawhan. Mao nga ihiklin una nato ang mga butang nga makapaaway kanato ug moabiba sa tamas ginhawa sa atong mga kampyon. (@anol_cebu sa Twitter)