SUPPORTERS? Ang mga drug pusher ug mogamit sa ilegal nga drogas kon madakpan sa pulis sayon ra nga itug-an ang ilang mga ngalan ngadto sa media bisan kon wa pa mapasakahi og sumbong sa piskaliya. Apan ang mga empleyado sa Cebu City Hall nga napamatud-an nga migamit og shabu human sa drug test miundang na lang sa trabaho apan wa gihapon hinganli.
Daghan ang nagduda nga kining mga empleyado nga nasakpan nga mogamit og ilegal nga drugas mga dumadapig sa kasamtangan nga administrasyon o di ba mga bata-bata ni sila og usa ka dakong tawo o di ba impluwensyal nga tawo diha sa City Hall kay gawas nga wa hinganli wa pa jud pasakae og kaso.
Kay miundang na man ning maong mga empleyado sa ilang trabaho sa City Hall ang sunod mahitabo nga mobalik ni sila sa ilang ilegal nga bisyo. Ang dakong pangutana nganong nakasulod man ni sila og trabaho nga maggamitan man diay og ilegal nga drogas.
Ato ba ni nga sabton nga nagpataka lang og dawat ang dakbayan sa Sugbo sa mga ni-apply og trabaho ug wa gitan-aw ang ilang background tungod kay rekomendado sa usa sa mga pinili nga opisyal sa dakbayan sa Sugbo? Mayor Edgar Labella, maayo tingali nga imong ipasusi og maayo aron di mobanda nimo ang sipyat sa imong mga sinaligan sa ubos.
•••
NASAYOP? Sa nag-una nako nga lindog sa pagdawat ni VP Leni Robredo sa hagit ni Presidente Duterte nga siya ang mangulo sa pakigbatok sa ilegal nga drogas niingon ko nga morag natuk-an ang Malakanyang nga gidawat ni VP Robredo ang tanyag ni Presidente Duterte bisan pa sa pagdumili sa iyang kauban sa partido.
Niadtong Dominggo, Nob. 24, gitangtangan ni Presidente Duterte si VP Robredo sa iyang trabaho isip co-chairperson sa inter-agency committee against drugs (ICAD). Morag igo lang gipainit kadiyot sa lingkoranan si VP Robredo kay niadtong Nob. 6 pa nga iyang gidawat ang posisyong anti-illegal drugs czar.
Ang hinungdan kay nawad-an og pagsalig si Presidente Duterte ni VP Robredo. Nahadlok ang Malakanyang kay basin motug-an si Robredo sa mga sekreto sa pulis sa pagpatuman sa Oplan Tokhang ni Presidente Duterte nga gipatuman ni kanhi PNP chief Bato Dela Rosa nga karon senador na.
Apan dunay mga hungihung nga akong nadunggan nga ang usa sa tinuoray nga rason nganong dali nga gibakwi ang appointment ni VP Robredo ngan nga co-chairman sa ICAD tungod kay mireklamo ang miprotesta sa kadaugan ni VP Robredo kay nahatagan siya og posisyon nga mosikat.
Abi ninyo kining nahitabo karon sa pagbakwi sa trabaho nga gihatag ni Presidente Duterte kang VP Robredo mogawas nga naunay sa ilang laang ang Malakanyang sa bise presidente.