GIKLARO sa Department of Health (DOH) nga nakaalarma ang kaso sa polio dinhi sa nasud diin anaa na sa pito ang nagpositibo karong panahona.
Target sa DOH nga mabakunahan ang anaa sa 584,076 nga bata sa Northern Mindanao sa duha ka semana nga pagpamakuna.
Gibutyag ni Regional Director Adriano Suba-an sa DOH-Northern Mindanao nga nakaalarma kini sa rehiyon ilabi na nga silingan lamang ang mga dapit nga duna nay nagpositibo og polio virus.
"Yes, it is kay silingan ra man gud ta and the population move around and the IDPs of the Marawi Lanao del Sur, they went to Iligan, and Iligan City is part of Northern Mindanao," matud ni Suba-an.
Gi-aghat niini ang mga ginikanan nga dalhon ang anak ug siguraduhon nga mapabakunahan aron nga maluwas gikan niining makapatay nga sakit.
"Bakunahan gyud ang mga bata libre naman eh, andito tayo ngayon para mag-ipon ipon para potektahan ang atong bata, ug hatagan nato og Christmas polio gift ang bata to protect them from polio," dugang pa.
Samtang sa siyudad sa Cagayan de Oro, anaa usab sa 81,000 ka mga bata ang gilaomang mabakunahan pinaagi sa oral vaccine sugod Nobyimbre 25 hangtod Disyembre 7.
2 patay
Samtang duha ang giingong patay sa kaso nga Acute Flaccid Paralysis (AFP) nga gitutokan sa tinugyanan sa DOH-Northern Mindanao ilabi na sa hugot nga kampanya batok polio.
Gibutyag ni Regional Director Adriano Suba-an nga tungod sa hugot nga kampanya, ilang gimonitor ang mga kabataan gikan sa 15 anyos paubos sugod sa bulan sa Enero hangtod Nobyimbre.
Hinuon, giklaro ni Suba-an nga sa 51 ka mga kaso wala pay nagpositibo sa poliovirus. Anaa sa 42 ang nagagikan sa Northern Mindanao, 2 sa Zamboanga Peninsula ug 7 gikan sa Bangsamoro Autonomous Region in Muslim Mindanao (Barmm) nga kasamtangang ania sa rehiyon.
"Ginamonitor nato pero out of this 42 non-polio related, so AFP siya pero non-polio, so we still waiting for the pending result sa remaining number of yung AFP cases," matud ni Suba-an.
Nanghinaot kini nga walay magpositibo nga poliovirus sa nabilin nga siyam nga wala pa ang resulta sa eksaminasiyon.
"Hoping makuha na nato ang result pero we're hoping nga zero, wala gyud kay naay namatay 2, two deaths pero non polio related, AFP cases, na paralyzed pero dili siya polio," dugang pa.