SIKOP ang usa ka sundalo human mikasa sa pistola ngadto sa iyang kainom sa Purok-2, Lumbo, siyudad sa Valencia, Bukidnon.
Nahitabo ang insidente adlawng Sabado mga alas 11:23 sa gabii samtang si Private First Class Raymund B. Sarausa, 26, ulitawo, sakop sa Philippine Army, ang nanghadlok gamit iyang armas ngadto kang Ariel Ollada, 26, usa ka sibilyan.
Sa report sa Valencia City Police Station, nasuta nga nag-inom kining duha apan sa kalit nga hitabo, mikasa sa iyang pistola si Sarausa, hinungdan sa grabeng kakulba nga gibati ni Ollada.
Human nadawat sa kapolisan ang insidente, giadtoan ug gisikop ang sundalo kung asa nakuha gikan sa posisyon niini ang kalibre 45 ng adunay 20 ka mga buhing bala.
Grave threats ang gitakdang atubangon sa sundalo karon nga nagtingkagol na sa prisuhan karon panahoha.